भावनिक पुनरागमन आणि कृतज्ञतेचा संदेश
विश्वचषकापूर्वी भारतीय संघात नवचैतन्य
भारताचा युवा अष्टपैलू खेळाडू टिळक वर्माने दुखापतीतून सावरत टी20 विश्वचषकाच्या सराव सामन्यात प्रभावी पुनरागमन केले. नवी मुंबईतील डीवाय पाटील स्टेडियमवर झालेल्या या सामन्यात भारताने गतविजेत्या दक्षिण आफ्रिकेचा 30 धावांनी पराभव केला. टिळकने केवळ 19 चेंडूत 45 धावांची आक्रमक खेळी साकारत आपली तयारी दाखवून दिली. पुनर्वसनासाठी बीसीसीआय आणि सेंटर ऑफ एक्सलन्सचे त्याने मनापासून आभार मानले. विश्वचषकापूर्वी मिळालेल्या या कामगिरीमुळे भारतीय संघाचा आत्मविश्वास दुणावला आहे.
नवी दिल्ली : भारताचा अष्टपैलू खेळाडू टिळक वर्मा याने दुखापतीनंतर मैदानात जोरदार पुनरागमन करत टी20 विश्वचषकाच्या सराव सामन्यात दक्षिण आफ्रिकेविरुद्ध लक्षवेधी कामगिरी केली. नवी मुंबईतील डीवाय पाटील स्टेडियम येथे झालेल्या या सामन्यात भारताने 30 धावांनी विजय मिळवला. सामन्यानंतर टिळकने आपल्या भावना व्यक्त करताना पुनर्वसन प्रक्रियेसाठी BCCI आणि सेंटर ऑफ एक्सलन्स (CoE) यांचे आभार मानले.
“मी इतक्या लवकर मैदानात परत येईन, अशी अपेक्षा नव्हती. CoE आणि BCCI मुळेच हे शक्य झाले. विश्वचषक खेळणे हे माझे स्वप्न आहे,” असे टिळकने प्रहार डिजिटलने शेअर केलेल्या व्हिडिओत सांगितले. प्रेक्षकांनी नावाचा गजर केल्याने आपण भावूक झालो असल्याचेही त्याने नमूद केले.
भारतीय फलंदाजांची आक्रमक सुरुवात पाहून आपल्यालाही मुक्तपणे खेळण्याची प्रेरणा मिळाल्याचे टिळक म्हणाला. इशान किशन, अभिषेक शर्मा यांच्या आक्रमक फलंदाजीमुळे संघात सकारात्मक ऊर्जा होती. त्याचा फायदा घेत टिळकने 19 चेंडूत 45 धावा करत भारताच्या 240/5 या भक्कम धावसंख्येत मोलाचा वाटा उचलला.
यानंतर भारतीय गोलंदाजांनी प्रभावी मारा करत दक्षिण आफ्रिकेला 210 धावांवर रोखले. या विजयामुळे विश्वचषकापूर्वी भारतीय संघाची तयारी मजबूत झाल्याचे चित्र आहे. शनिवारी होणाऱ्या USA विरुद्धच्या सलामी सामन्यापूर्वी टिळकचे हे पुनरागमन भारतासाठी मोठा सकारात्मक संकेत मानला जात आहे.
