खेड (प्रतिनिधी) – खेड तालुक्यातील भिलारे आयनी येथील ग्रामपंचायत कार्यालयात ग्रामसभेदरम्यान ग्रामसेवकावर धक्काबुक्की व शासकीय कामात अडथळा केल्याच्या आरोपांप्रकरणी न्यायालयाने आरोपींची निर्दोष मुक्तता केल्याचा महत्त्वपूर्ण निकाल दिला आहे. भारतीय दंड विधान कलम ३५३ सह इतर कलमांखाली दाखल करण्यात आलेला हा गुन्हा सरकारी बाजूकडून सिद्ध न झाल्याने न्यायालयाने आरोपींच्या बाजूने निर्णय दिला.
या प्रकरणात भिलारे आयनी, तालुका खेड, जिल्हा रत्नागिरी येथील ग्रामसेवक राहुल राजेंद्र चौधरी यांनी खेड पोलीस ठाण्यात फिर्याद दाखल केली होती. फिर्यादीत नमूद केल्यानुसार, दिनांक ४ फेब्रुवारी २०२४ रोजी दुपारी सुमारे दोन वाजता ग्रामपंचायत कार्यालयात शासकीय ग्रामसभा सुरू असताना आरोपी सुनील कुमार राजाराम शिंदे व राजेंद्र यशवंत भिलारे यांनी संगनमत करून ग्रामसभेत वाद घातला. या वादातून त्यांनी ग्रामसेवकाच्या अंगावर जाऊन धक्काबुक्की केली, साधी दुखापत केली तसेच शासकीय काम करत असताना अडथळा निर्माण केला, असा आरोप करण्यात आला होता. या तक्रारीच्या आधारे खेड पोलिसांनी भारतीय दंड विधान कलम ३३२, ३५२, ३५३, ३२३, ५०४ आणि ५०६ अन्वये गुन्हा दाखल करून तपासाअंती दोषारोपपत्र न्यायालयात सादर केले होते.
खटल्याच्या सुनावणीदरम्यान आरोपींच्या वतीने ॲडव्होकेट सुधीर शरद बुटाला यांनी बाजू मांडली. बचाव पक्षाकडून सरकारी साक्षीदारांचा सखोल उलटतपास घेण्यात आला. या उलटतपासात साक्षीतील विसंगती, घटनाक्रमाबाबत असलेली संदिग्धता तसेच तपासात झालेल्या त्रुटी न्यायालयाच्या निदर्शनास आणून देण्यात आल्या. सरकारी बाजूकडून सादर करण्यात आलेले पुरावे आरोपींविरुद्ध आरोप सिद्ध करण्यास अपुरे असल्याचे बचाव पक्षाने ठामपणे मांडले.
सर्व साक्षी, उलटतपासातील मुद्दे, तपासातील त्रुटी आणि दोन्ही बाजूंचे युक्तिवाद विचारात घेऊन अतिरिक्त जिल्हा न्यायाधीशांनी निकाल दिला. आरोपींविरुद्ध शासकीय कर्मचारी कर्तव्यावर असताना हल्ला व अडथळा केल्याचा आरोप सिद्ध करण्यासाठी आवश्यक ठोस व विश्वासार्ह पुरावे उपलब्ध नसल्याचे न्यायालयाने नमूद केले. त्यामुळे आरोपी सुनील कुमार राजाराम शिंदे व राजेंद्र यशवंत भिलारे यांची सर्व आरोपांतून निर्दोष मुक्तता करण्यात आली.
या निकालामुळे ग्रामसभेदरम्यान घडलेल्या घटनांबाबत दाखल झालेल्या गंभीर स्वरूपाच्या गुन्ह्यांत पुराव्यांचे महत्त्व अधोरेखित झाले असून, तपास व साक्षी सादरीकरणात काटेकोरपणाची आवश्यकता असल्याचे पुन्हा एकदा स्पष्ट झाले आहे.
