पालकमंत्री ना. नितेश राणे यांच्या हस्ते वाटप
नगरसेविका दिपाली भालेकर यांच्या पाठपुराव्याला यश
सावंतवाडी | प्रतिनिधी : येथील जिल्हा परिषद भटवाडी प्राथमिक शाळा क्रमांक ६ आणि वि. स. खांडेकर विद्यालय या दोन शाळांच्या शैक्षणिक प्रगतीला बळ देण्यासाठी विधान परिषदेचे आमदार निरंजन डावखरे यांच्या स्थानिक विकास निधीतून संगणक संच उपलब्ध करून देण्यात आले आहेत. शनिवार, दिनांक २८ मार्च रोजी सिंधुदुर्गचे पालकमंत्री ना. नितेश राणे यांच्या शुभहस्ते या संगणक संचांचे अधिकृत वाटप करण्यात आले.
नगरसेविका दिपाली भालेकर आणि दिलीप भालेकर यांनी या दोन्ही शाळांसाठी सातत्याने पाठपुरावा केला होता, त्यांच्या या प्रयत्नांना यश आले असून विद्यार्थ्यांना आता आधुनिक तंत्रज्ञानाचे धडे गिरवता येणार आहेत.
दिग्गजांची उपस्थिती
सावंतवाडी येथे आयोजित या छोटेखानी वितरण समारंभाला आमदार निरंजन डावखरे यांची प्रमुख उपस्थिती होती. तसेच जिल्हा परिषद अध्यक्ष प्रमोद कामत, भारतीय जनता पार्टीचे जिल्हाध्यक्ष प्रभाकर सावंत, महिला जिल्हाध्यक्षा श्वेता कोरगांवकर, पंचायत समिती सदस्य महेश धुरी यांसह पक्षाचे विविध पदाधिकारी आणि शिक्षण प्रेमी नागरिक मोठ्या संख्येने उपस्थित होते.
तंत्रज्ञानाधारित शिक्षणावर भर
यावेळी बोलताना मान्यवरांनी सांगितले की, ग्रामीण आणि निमशहरी भागातील विद्यार्थ्यांना जागतिक स्पर्धेत टिकण्यासाठी संगणकीय ज्ञान असणे अनिवार्य आहे.
आमदार निधीतून मिळालेल्या या मदतीमुळे शाळांमधील डिजिटल साक्षरतेचे प्रमाण वाढण्यास मदत होईल. नगरसेविका दिपाली भालेकर यांनी शाळांच्या गरजा ओळखून हा निधी खेचून आणल्याबद्दल त्यांचे कौतुक करण्यात आले.
या कार्यक्रमाप्रसंगी शाळा व्यवस्थापन समितीचे पदाधिकारी, शिक्षक आणि विद्यार्थी उपस्थित होते. आपल्या शाळेला नवीन संगणक मिळाल्यामुळे विद्यार्थ्यांनी आनंद व्यक्त केला असून मान्यवरांचे आभार मानले आहेत.
