यवतमाळ जिल्ह्यातील पांगरी गावात वैवाहिक नात्याला काळीमा फासणारी धक्कादायक घटना समोर आली आहे. पत्नीने कथित प्रियकराच्या मदतीने पतीला संपवण्याचा कट रचल्याचा आरोप करण्यात आला आहे. झोपेत असलेल्या पतीला विजेचा धक्का देऊन ठार मारण्याचा प्रयत्न करण्यात आल्याचे पोलिस तपासात उघड झाले. मात्र प्रसंगावधान राखल्यामुळे पीडित व्यक्तीचा जीव थोडक्यात बचावला. या प्रकरणी पोलिसांनी पत्नी आणि तिच्या कथित प्रियकराला अटक केली असून पुढील तपास सुरू आहे.
अनैतिक संबंधांमुळे पती ठरत होता अडथळा
यवतमाळ : जिल्ह्यातील पांगरी गावात घडलेल्या या घटनेमुळे परिसरात मोठी खळबळ उडाली आहे. वडगाव जंगल पोलीस ठाण्याच्या हद्दीत ही घटना घडली. पीडित गजानन मोरे यांनी दिलेल्या तक्रारीनुसार, त्यांच्या पत्नीचे गावातील रहिवासी विष्णू कडू आत्राम याच्यासोबत कथित अनैतिक संबंध होते. या संबंधांची माहिती गजानन मोरे यांना मिळाल्यानंतर घरात वारंवार वाद होत होते.
तक्रारीनुसार, पत्नी कविता मोरे आणि कथित प्रियकर विष्णू आत्राम यांनी गजानन मोरे यांना मार्गातून हटवण्याचा कट रचला. पती हा त्यांच्या संबंधांमध्ये अडथळा ठरत असल्याने त्याला संपवण्याचा निर्णय घेतल्याचा आरोप करण्यात आला आहे.
झोपेत असताना विजेचा धक्का देण्याचा प्रयत्न
३ मे रोजी मध्यरात्री सुमारे २ वाजण्याच्या सुमारास गजानन मोरे घरात झोपलेले असताना पत्नीने ॲल्युमिनियमची तार आणि विजेचा प्रवाह वापरून त्यांना करंट देण्याचा प्रयत्न केल्याचा आरोप आहे. अचानक बसलेल्या विजेच्या धक्क्यामुळे गजानन मोरे जागे झाले. त्यांनी तत्काळ सावध होत स्वतःचा बचाव केला. या घटनेत त्यांच्या दोन्ही हातांना भाजल्याची माहिती समोर आली आहे.
घटनेची माहिती मिळताच पोलिसांनी घटनास्थळी धाव घेतली आणि तेथून विजेची तार तसेच ॲल्युमिनियमची वायर जप्त केली. सुरुवातीला पोलिसांना या घटनेबाबत संशय निर्माण झाला होता. मात्र चौकशीत संपूर्ण प्रकार उघडकीस आला.
या प्रकरणी पोलिसांनी कविता मोरे आणि विष्णू आत्राम या दोघांविरोधात गुन्हा दाखल करून त्यांना अटक केली आहे. या प्रकरणाचा पुढील तपास पोलीस उपनिरीक्षक भाऊराव बोकडे करत आहेत. या घटनेमुळे संपूर्ण परिसरात मोठी चर्चा सुरू झाली आहे.
