खेड (प्रतिनिधी) : ज्ञानदीप इंग्लिश मीडियम स्कूल (CBSE), मोरवंडे-बोरज येथे आंतरराष्ट्रीय योग दिन मोठ्या उत्साहात आणि शिस्तबद्ध वातावरणात साजरा करण्यात आला. या कार्यक्रमात शाळेतील विद्यार्थी, शिक्षक तसेच शिक्षकेतर कर्मचाऱ्यांनी उत्स्फूर्त सहभाग नोंदवत योगाचे महत्त्व अधोरेखित केले.
कार्यक्रमाच्या प्रारंभी योगाचे महत्त्व, त्याचे आरोग्यदायी फायदे आणि निरोगी जीवनशैलीसाठी योगाची आवश्यकता याविषयी विद्यार्थ्यांना मार्गदर्शन करण्यात आले. त्यानंतर विद्यार्थ्यांनी विविध योगासने, प्राणायाम आणि ध्यानाचे प्रभावी प्रात्यक्षिक सादर केले. योगामुळे शारीरिक, मानसिक आणि भावनिक आरोग्य सुदृढ राहते तसेच एकाग्रता, आत्मविश्वास आणि सकारात्मक विचारसरणी विकसित होण्यास मदत होते, अशी माहिती विद्यार्थ्यांना देण्यात आली.
या कार्यक्रमाचे नियोजन आणि आयोजन शाळेचे क्रीडा शिक्षक श्री. आशिष देशमाने आणि कु. हर्षदा पार्टे यांनी केले. त्यांच्या मार्गदर्शनाखाली विद्यार्थ्यांनी विविध योगासने उत्कृष्टपणे सादर करून उपस्थितांची दाद मिळवली.
यावेळी शाळेचे प्राचार्य श्री. भरत मोरे यांनी विद्यार्थ्यांना नियमित योगाभ्यास करण्याचे आवाहन केले. योग हा भारतीय संस्कृतीचा अमूल्य वारसा असून निरोगी आणि संतुलित जीवनासाठी त्याचा अंगीकार करणे आवश्यक असल्याचे त्यांनी सांगितले.
संस्थेचे सरचिटणीस श्री. माधव पेठे यांनीही विद्यार्थ्यांना मार्गदर्शन करत योगाच्या माध्यमातून निरोगी, सक्षम आणि सुसंस्कृत नागरिक बनण्याचा संदेश दिला. योगामुळे व्यक्तिमत्त्व विकासास चालना मिळते आणि जीवनात सकारात्मकता निर्माण होते, असे त्यांनी नमूद केले.
विद्यार्थ्यांनी अत्यंत शिस्तबद्ध पद्धतीने योगासने आणि प्राणायाम सादर करून कार्यक्रमाची शोभा वाढवली. कार्यक्रमाच्या यशस्वी आयोजनाबद्दल उपस्थितांनी क्रीडा विभाग, शिक्षकवृंद आणि विद्यार्थ्यांचे कौतुक केले. “योग करा, निरोगी रहा” हा संदेश देत कार्यक्रमाची सांगता करण्यात आली.
