रील्स आणि घरगुती कुंड्यांमध्ये आधुनिक ‘सावित्री’ अवतरली!
सावंतवाडी:
“सात जन्म हाच पती मिळावा” अशी आर्त साद घालत आणि जन्मोजन्मीच्या नात्याची वीण अधिक घट्ट करण्याचा संकल्प सोडत, आज सावंतवाडी शहर व परिसरातील गावोगावच्या सावित्रींनी वटपौर्णिमा मोठ्या उत्साहात साजरी केली. वटवृक्षाला प्रदक्षिणा घालत, आपल्या पतीराजांच्या दीर्घायुष्यासाठी आणि सुदृढ आरोग्यासाठी महिलांनी मनोभावे प्रार्थना केली. या मंगलमयी दिनानिमित्त संपूर्ण सावंतवाडी तालुका सौभाग्यलेण्यांच्या रंगात न्हाऊन निघाला होता.
पौराणिक आख्यायिकेनुसार, सावित्रीचा पती सत्यवान हा वडाच्या झाडाखालीच गतप्राण झाला होता. मात्र, आपल्या अढळ पतिव्रत्य आणि बुद्धीच्या बळावर सावित्रीने यमराजाकडून सत्यवानाचे प्राण परत मिळवले, असा इतिहास आहे. याच पावन संकेताचे स्मरण ठेवत, दरवर्षी ज्येष्ठ पूर्णिमेला महिला वटवृक्षाची पूजा करतात. वडाच्या मुळाशी कृतज्ञतेने जलार्पण करून, वृक्षाला सुताचे वेष्टण गुंडाळत महिलांनी आपल्या सौभाग्याचे साकडे घातले. पूजेचा विधी संपन्न झाल्यानंतर सुवासिनींनी परस्परांना पारंपरिक वाण देऊन सौभाग्यचिन्हांची देवाणघेवाण केली.
बदलत्या काळाची पावले ओळखून यंदा पूजेच्या पद्धतीत परंपरा आणि आधुनिकतेचा सुंदर संगम पाहायला मिळाला. ग्रामीण भागात वाड्या-वस्त्यांवर आणि रस्त्यांच्या कडेला असलेल्या पुरातन वटवृक्षांच्या छायेत महिला एकत्र आल्या होत्या. तर दुसरीकडे, सावंतवाडी शहरातील काही सोसायट्यांमध्ये आणि आधुनिक वस्त्यांमध्ये महिलांनी निसर्गाची हानी टाळत कुंडीत वडाचे रोप किंवा छोटी फांदी लावून तिचे पूजन केले. काही ठिकाणी वडाच्या झाडाचे सुंदर चित्र रेखाटून त्यालाच वंदना देण्यात आली. या पारंपारिक सोहळ्याला डिजिटल युगाची जोड मिळाली असून, पूजा करतानाचे मनमोहक फोटो आणि रील्स सोशल मीडियावर दिवसभर मोठ्या प्रमाणावर पाहायला मिळत होते.
शहरी भागातील सोसायट्या असोत वा ग्रामीण भागातील निसर्गरम्य परिसर, सर्वत्रच सुवासिनींचा उत्साह ओसंडून वाहत होता. सामूहिक पूजनाच्या निमित्ताने नवविवाहित मुलींपासून ते ज्येष्ठ महिलांपर्यंत सर्वांनीच एकत्र येत या सणाचा आनंद द्विगुणित केला आणि सावंतवाडी तालुक्यात वटपौर्णिमेचा हा सोहळा अत्यंत चैतन्यमय वातावरणात संपन्न झाला.
