सावंतवाडी । प्रतिनिधी :
दुर्ग मावळा प्रतिष्ठान, सह्याद्री ॲडव्हेंचर अँड रेस्क्यू ग्रुप (आंबोली–सांगेली) तसेच नैसर्गिक पर्यावरण संवर्धन व मानवता विकास संस्था अंतर्गत राष्ट्रीय ऐतिहासिक वास्तू संवर्धन विकास समिती, सिंधुदुर्ग यांच्या संयुक्त विद्यमाने आयोजित ‘रांगणा सफर २०२६’ ही मोहीम रविवार, दिनांक १९ जुलै २०२६ रोजी अत्यंत उत्साही वातावरणात पार पडली.
दुर्ग मावळा प्रतिष्ठानच्या वतीने सलग तिसऱ्या वर्षी या ऐतिहासिक दुर्गसफरीचे यशस्वी आयोजन करण्यात आले होते. पावसाळ्यात दुर्गप्रेमींना रांगणागडाचा समृद्ध इतिहास, तिथले वास्तुशिल्प आणि नैसर्गिक वारसा प्रत्यक्ष अनुभवता यावा, तसेच लोकांमध्ये दुर्गसंवर्धनाची जाणीव निर्माण व्हावी, या मुख्य उद्देशाने या मोहिमेचे आयोजन करण्यात येते.
या सफरीदरम्यान दुर्गदर्शन, दुर्गपूजन आणि दुर्गसंवर्धनाचे काम करण्यात आले. याशिवाय आपत्ती व्यवस्थापनाविषयीची प्रात्यक्षिके, साहसी उपक्रम (ॲडव्हेंचर ॲक्टिव्हिटी) आणि वृक्षारोपण अशा विविध भरगच्च कार्यक्रमांचे आयोजन करण्यात आले होते. पर्यावरण संवर्धनाचा संदेश देत या वेळी जांभूळ, बहावा आणि वड या देशी वृक्षांच्या रोपांची लागवड गडावर करण्यात आली.
या मोहिमेचे मुख्य वैशिष्ट्य म्हणजे यात ५ वर्षांच्या बालकापासून ते ८० वर्षांच्या ज्येष्ठ दुर्गप्रेमींपर्यंत सर्व वयोगटातील लोकांनी उत्स्फूर्त सहभाग घेतला होता. सिंधुदुर्ग जिल्ह्यातील एकूण ४६ दुर्गप्रेमींनी या सफरीमध्ये सहभागी होऊन इतिहास, निसर्ग आणि साहसाचा एक अनोखा संगम अनुभवला.
सफरीच्या समारोपप्रसंगी आयोजकांतर्फे सर्व सहभागींचे आभार मानण्यात आले. तसेच या मोहिमेत योगदान देणाऱ्या प्रत्येक दुर्गप्रेमीला सहभाग प्रमाणपत्र देऊन सन्मानित करण्यात आले. भविष्यातही दुर्गसंवर्धन आणि निसर्गपूरक उपक्रमांमध्ये अशाच मोठ्या संख्येने सहभागी होण्याचा संकल्प सर्व उपस्थितांनी या वेळी व्यक्त केला.
