अंगणवाडी क्र. १५ मध्ये भावूक वातावरणात गुरुपौर्णिमा साजरी
सावंतवाडी:
गुरुपौर्णिमेच्या पावन प्रसंगी आपल्या गुरुला वंदन करण्याची प्राचीन भारतीय संस्कृती जपण्यासोबतच, जीवनातील ‘पहिली गुरू’ असलेल्या आईचा सन्मान करण्यासाठी सावंतवाडी शहरातील अंगणवाडी क्रमांक १५ मध्ये एका विशेष व आगळ्यावेगळ्या कार्यक्रमाचे आयोजन करण्यात आले होते. या वेळी तीन ते पाच वर्षे वयोगटातील चिमुकल्यांनी स्वतःच्या आईची पाद्यपूजा व औक्षण करून अत्यंत उत्साहपूर्ण आणि भावूक वातावरणात गुरुपौर्णिमा साजरी केली.
मुलांवर बालवयातच उत्तम संस्कार रुजावेत, या हेतूने शिशु वाटिका व अंगणवाडीच्या माध्यमातून या स्तुत्य उपक्रमाचे आयोजन अंगणवाडी सेविका अनुराधा पवार आणि मदतनीस अमिषा सासोलकर यांनी केले होते.
श्लोकोच्चार आणि गीतांनी परिसर भक्तिमय
या विशेष कार्यक्रमादरम्यान लहानग्यांनी सर्वप्रथम आपल्या आईची पाद्यपूजा केली आणि त्यानंतर औक्षण करून तिचे आशीर्वाद घेतले. या प्रसंगी मुलांनी अत्यंत सुरेल आवाजात “गुरुर्ब्रह्मा गुरुर्विष्णु गुरुर्देवो महेश्वरा…” हा श्लोक तसेच आईचे महत्त्व सांगणारी भावगीते गायली. चिमुकल्यांच्या या भक्तीरसपूर्ण सादरीकरणामुळे संपूर्ण अंगणवाडी परिसर अत्यंत भावूक आणि धार्मिक वातावरणाने व्यापून गेला होता.
लहानग्यांचा उत्साही सहभाग
या कार्यक्रमात अंगणवाडीतील ष्रिशा देशमुख, स्वराज गोरे, दुर्वाश जाधव, समर्थ नेवगी, गितांश मुंज, नियात, शब्दाली कदम, रुद्राली बेळगावकर, अलिषा दापले, दुर्वा नाईक, अर्पिता कडगावकर, दक्षायनी, नितेश चव्हाण, हितेश बांदेकर, लकी शर्मा, वीरा रेडकर, दुर्वा कोरगावकर, रसिका गोरे, मल्हार लाखे, श्रुती गावडे आणि मोक्षतारी या सर्व चिमुकल्यांनी मोठ्या उत्साहाने भाग घेतला.
मातांचे डोळे पाणावले; परिसरातून कौतुकाचा वर्षाव
आपल्या लहानग्यांनी केलेले हे संस्कारपूर्ण वर्तन आणि घेतलेले दर्शन पाहून उपस्थित सर्वच मातांचे डोळे अभिमानाने व प्रेमाने पाणावले. या प्रसंगी श्रेया नेवगी, ज्योती कदम, आरती दापले, आर्या मुंज, अवंतिका गोरे आणि दिलीप देशमुख यांच्यासह सर्व पालक व माता मोठ्या संख्येने उपस्थित होत्या.
बालवयातच मुलांच्या मनावर आईप्रती कृतज्ञतेची भावना रुजविणाऱ्या या उपक्रमाचे सावंतवाडी शहरातून व संपूर्ण परिसरातून जोरदार कौतुक केले जात आहे.
