खेड (प्रतिनिधी) : वडगाव खुर्द, बागवाडी येथील बंद करण्यात आलेली पारंपरिक पायवाट खुली करण्याच्या मागणीसाठी ग्रामस्थांनी आक्रमक भूमिका घेतली आहे. शासकीय गावठाणातून घरापर्यंत जाणारी पारंपरिक पायवाट बंद करण्यात आल्याचा आरोप करत श्री. रुपेश परशुराम मोरे यांनी खेड तहसीलदारांकडे निवेदन सादर केले आहे. ही पायवाट सोमवार, १० ऑगस्ट २०२६ पर्यंत खुली न केल्यास शनिवार, १५ ऑगस्ट २०२६ रोजी तहसीलदार कार्यालयासमोर आमरण उपोषण करण्याचा इशारा निवेदनातून देण्यात आला आहे.
निवेदनानुसार, वडगाव खुर्द ग्रामपंचायतीमार्फत रुपेश मोरे यांच्या नावाने प्रधानमंत्री घरकुल योजनेअंतर्गत घरकुल मंजूर करण्यात आले आहे. संबंधित घरकुलासाठी जमीन मिळकत क्रमांक ७/१२ मधील ३९/२२ तसेच गावठाण क्षेत्रातील जमिनीचा वापर करण्यात येत असून, घरकुल बांधकामासाठी ग्रामपंचायतीने नियमानुसार मंजुरी दिली असल्याचे निवेदनात नमूद करण्यात आले आहे.
मात्र, घरकुलाकडे जाणाऱ्या गावठाणातून पारंपरिकरीत्या वापरात असलेली सुमारे पाच मीटर लांबीची पायवाट बंद करण्यात आल्याने ये-जा करण्यास अडचणी निर्माण झाल्या आहेत. ही पायवाट बंद केल्यामुळे घरकुलाकडे जाण्या-येण्याचा गैरसोय होत असल्याचे रुपेश मोरे यांनी म्हटले आहे.
या प्रकरणी महात्मा गांधी तंटामुक्त समितीच्या माध्यमातूनही संबंधित पायवाट खुली करण्याची मागणी करण्यात आली होती. वडगाव खुर्द येथील तंटामुक्त समिती सदस्यांनी बंद पायवाट खुली करून गैरसोय दूर करण्याची मागणी केल्याचे निवेदनात नमूद आहे. तसेच संबंधित व्यक्तींशी चर्चा करून पायवाट खुली करण्याबाबत प्रयत्न करण्यात आले होते. मात्र, अद्याप पायवाट खुली करण्यात आलेली नसल्याचा दावा करण्यात आला आहे.
शासकीय गावठाणातील पारंपरिक पायवाट असल्याने ती बंद ठेवणे योग्य नसल्याचे अर्जदाराचे म्हणणे आहे. त्यामुळे तहसीलदारांनी या प्रकरणाची तातडीने दखल घेऊन बंद करण्यात आलेली पायवाट खुली करावी आणि निर्माण झालेली गैरसोय दूर करावी, अशी मागणी करण्यात आली आहे.
पायवाट १० ऑगस्टपर्यंत खुली न झाल्यास १५ ऑगस्ट रोजी तहसीलदार कार्यालयासमोर आमरण उपोषण करण्याचा इशारा रुपेश परशुराम मोरे यांनी दिला आहे. या निवेदनाच्या प्रती महाराष्ट्राचे गृह राज्यमंत्री योगेश कदम, रत्नागिरीचे जिल्हाधिकारी, जिल्हा पोलीस अधीक्षक, खेडचे उपविभागीय महसूल अधिकारी, खेड पोलीस निरीक्षक तसेच खेड ग्रामपंचायत प्रशासनाकडेही देण्यात आल्या आहेत.
या प्रकरणात प्रशासन आता काय भूमिका घेते आणि पारंपरिक पायवाट खुली करण्याबाबत कोणती कार्यवाही करते, याकडे वडगाव खुर्द ग्रामस्थांचे लक्ष लागले आहे.
