गुहागर प्रतिनिधी:
पालशेत येथील मारुती मंदिर ते बाजारपेठ या प्रमुख मार्गावर मोठ्या प्रमाणात खड्डे पडल्याने नागरिक तसेच वाहनचालकांना त्रास सहन करावा लागत होता. पावसाळ्यामुळे खड्ड्यांमध्ये पाणी साचत असल्याने अपघाताचा धोका निर्माण झाला होता. नागरिकांची अडचण लक्षात घेऊन या रस्त्यावरील खड्डे बुजविण्याचे काम हाती घेण्यात आले.
पंचायत समिती सभापती प्रणव पोळेकर हे जातीने घटनास्थळी उपस्थित राहून या कामाची पाहणी करत होते. त्यांच्या मार्गदर्शनाखाली मारुती मंदिर ते बाजारपेठ या मार्गावरील खड्डे बुजविण्याचे काम सुरू करण्यात आले. त्यामुळे या मार्गावरून ये-जा करणाऱ्या नागरिकांना आणि वाहनचालकांना मोठा दिलासा मिळणार आहे. पंचायत समिती सभापती प्रणव पोळेकर यांनी पदभार स्वीकारल्यानंतर स्थानिक पातळीवरील विविध प्रश्नांकडे लक्ष देत नागरिकांच्या अडचणी सोडविण्यासाठी ते प्रत्यक्ष मैदानात उतरल्याचे पाहायला मिळत आहे.
पालशेत येथील रस्त्यावरील खड्ड्यांचा प्रश्न समोर आल्यानंतर त्यांनी केवळ पाठपुरावा न करता प्रत्यक्ष घटनास्थळी उपस्थित राहून कामाची पाहणी केली. त्यांच्या मार्गदर्शनाखाली खड्डे बुजविण्याचे काम सुरू झाल्याने स्थानिक नागरिकांमध्ये समाधान व्यक्त होत आहे. नागरिकांच्या मूलभूत सुविधांशी संबंधित प्रश्नांना प्राधान्य देत काम करण्याचा त्यांचा प्रयत्न असल्याचे दिसून आले.
