चिपळूण (प्रतिनिधी) : जपानमधील आयची-नागोया येथे झालेल्या २०२६ आशियाई क्रीडा स्पर्धेत भारतीय कबड्डी संघांनी पुरुष आणि महिला अशा दोन्ही गटांत सुवर्णपदक पटकावत देशाच्या क्रीडा क्षेत्रात मानाचा तुरा रोवला. या ऐतिहासिक कामगिरीनंतर भारतीय पुरुष कबड्डी संघातील प्रमुख खेळाडू आस्लम इनामदार तसेच भारतीय महिला कबड्डी संघातील सोनाली शिंगाटे यांचा मुंबईतील मंत्रालयात आमदार शेखर निकम यांच्या हस्ते सन्मानपूर्वक गौरव करण्यात आला.
भारताच्या पुरुष संघाने अंतिम सामन्यात इराणचा ४०-३४ असा पराभव करत सुवर्णपदकावर नाव कोरले, तर महिला संघानेही इराणवर ३७-३४ अशी मात करत सुवर्णपदक पटकावले. या दोन्ही विजयी संघांमध्ये महाराष्ट्रातील खेळाडूंच्या योगदानामुळे राज्याच्या क्रीडावैभवात आणखी भर पडली. यावेळी आमदार शेखर निकम यांनी आस्लम इनामदार आणि सोनाली शिंगाटे यांच्या उल्लेखनीय कामगिरीचे कौतुक करून त्यांचे अभिनंदन केले. आंतरराष्ट्रीय स्तरावर देशाचे प्रतिनिधित्व करताना मैदानावर दाखवलेली जिद्द, मेहनत, कौशल्य आणि संघभावना ही महाराष्ट्रातील युवा खेळाडूंसाठी प्रेरणादायी असल्याचे त्यांनी नमूद केले. सोनाली शिंगाटे यांनी भारतीय महिला संघाच्या उपकर्णधाराची जबाबदारीही सांभाळली, तर आस्लम इनामदार यांनी पुरुष संघाच्या सुवर्णपदकाच्या वाटचालीत महत्त्वपूर्ण योगदान दिले. अंतिम सामन्यात भारत अडचणीत असताना आस्लम यांनी केलेल्या महत्त्वपूर्ण रेड्समुळे संघाला सामन्यात पुनरागमन करण्यास मदत झाली.
महाराष्ट्राच्या मातीतून घडलेले हे क्रीडाशिलेदार आज देशाच्या अभिमानाचे प्रतीक ठरले आहेत. त्यांच्या यशामुळे राज्यातील कबड्डीपटूंसह विविध क्रीडा प्रकारांतील युवा खेळाडूंना नवी प्रेरणा मिळाली आहे. ग्रामीण आणि सामान्य कुटुंबातून पुढे येणाऱ्या खेळाडूंनी आंतरराष्ट्रीय स्तरावर आपल्या गुणवत्तेचा ठसा उमटविण्याची क्षमता महाराष्ट्रात असल्याचे या यशातून पुन्हा अधोरेखित झाले. यावेळी आमदार शेखर निकम यांनी दोन्ही सुवर्णपदक विजेत्या खेळाडूंना त्यांच्या पुढील क्रीडा वाटचालीसाठी शुभेच्छा दिल्या. “खेळाच्या मैदानावर मिळवलेले यश हे केवळ पदक नसते, तर ते हजारो युवा खेळाडूंच्या स्वप्नांना नवी दिशा देणारी प्रेरणा असते,” या भावनेतून त्यांनी आस्लम इनामदार आणि सोनाली शिंगाटे यांच्या कामगिरीचे कौतुक केले. आयची-नागोया २०२६ आशियाई क्रीडा स्पर्धेत भारतीय कबड्डीने मिळवलेल्या या दुहेरी सुवर्णयशामुळे महाराष्ट्राच्या शिरपेचात आणखी एक मानाचा तुरा खोवला गेला आहे.
