सावंतवाडी (प्रतिनिधी) :
महाराष्ट्राच्या समृद्ध आणि देदीप्यमान नाट्यपरंपरेचा वारसा नव्या हिरिरीने पुढे नेणाऱ्या प्रतिष्ठित राज्य नाट्यस्पर्धेत सावंतवाडीच्या सांस्कृतिक वैभवात आणखी एक सुवर्णपान जोडले गेले आहे. क्षितिज इव्हेंट, सावंतवाडी निर्मित ‘संगीत वीज म्हणाली धरतीला’ या नाटकातील कलाकारांनी आणि तंत्रज्ञांनी आपल्या कसदार अभिनयाने तसेच नेपथ्य व रंगभूषादी कौशल्याने परीक्षकांची आणि नाट्यरसिकांची मने जिंकली. पात्रांच्या रूपाला जिवंतपणा आणि अनोखी प्रगल्भता देणाऱ्या उत्कृष्ट रंगभूषेसाठी रंगभूषाकार संजय जोशी यांना प्रथम क्रमांकाचे मानाचे पारितोषिक देऊन गौरविण्यात आले.
महाराष्ट्र शासनाच्या सांस्कृतिक कार्य विभागाच्या अंतर्गत सांस्कृतिक कार्य संचालनालयाद्वारे आयोजित ६४ व्या महाराष्ट्र राज्य हौशी मराठी, हिंदी, संगीत व संस्कृत नाट्य स्पर्धेच्या अंतिम फेरीचा, तसेच २२ वी बालनाट्य स्पर्धा, ७ वी दिव्यांग बालनाट्य स्पर्धा आणि प्रथम महाराष्ट्र राज्य मराठी एकांकिका स्पर्धेच्या अंतिम फेरीचा भव्य ‘नाट्यगौरव’ राज्यस्तरीय पारितोषिक वितरण सोहळा २०२५-२६ अत्यंत दिमाखात संपन्न झाला.
कार्यक्रमाचे औचित्य साधत जानेवारी २०२६ मध्ये पार पडलेल्या या स्पर्धांमधील विजेत्यांचा सन्मान करण्यात आला. या संपूर्ण सोहळ्यात सावंतवाडीच्या ‘क्षितिज इव्हेंट’ संस्थेने सादर केलेल्या ‘संगीत वीज म्हणाली धरतीला’ या नाटकाने आपल्या उत्कृष्ट कलागुणांच्या जोरावर राज्यस्तरीय अंतिम फेरीत तब्बल पाच वैयक्तिक पारितोषिकांवर आपले नाव कोरत सावंतवाडीचा सांस्कृतिक ध्वज राज्यभरात अभिमानाने फडकत ठेवला.
या नाटकात आपल्या सहज आणि कसदार अभिनयाने रंगमंच उजळवून टाकणाऱ्या क्षितीजच्या आज्ञा कोयंडे यांना अभिनयाचे रौप्य पदक बहाल करण्यात आले. नाटकातील दृश्यांना भव्यता आणि गती देणाऱ्या तंत्रज्ञानाच्या उत्कृष्ट समन्वयासाठी बाळ पुराणिक (दत्तात्रय पुराणिक) यांना नेपथ्यासाठी द्वितीय पारितोषिक देऊन सन्मानित करण्यात आले, तर पात्रांचे व्यक्तित्व अधोरेखित करणाऱ्या वेशभूषा विभागात वैभवी पुराणिक यांनी द्वितीय पारितोषिक पटकावले. याचबरोबर नाटकातील दृष्यपरिणाम प्रभावी ठरवणाऱ्या प्रकाश योजनेसाठी अभिषेक कोयंडे यांना तृतीय पारितोषिक प्राप्त झाले.
मुंबईतील माटुंगा येथील यशवंत नाट्य मंदिर येथे सोमवार, २ नोव्हेंबर रोजी सायंकाळी पार पडलेल्या या दिमाखदार सोहळ्यात राज्याचे सांस्कृतिक कार्य, इलेक्ट्रॉनिक्स, माहिती तंत्रज्ञान व कृत्रिम बुद्धिमत्ता मंत्री ॲड. आशिष शेलार यांच्या शुभहस्ते विजेत्या सर्व कलाकार व तंत्रज्ञांना सन्मानचिन्ह व पारितोषिक देऊन गौरविण्यात आले. याप्रसंगी बोलताना पुढील वर्षापासून संगीत एकांकिका स्पर्धा आयोजित करण्यात येणार असल्याची महत्त्वपूर्ण घोषणा मंत्री आशिष शेलार यांनी केली.
या मंगलमय सोहळ्यास सांस्कृतिक कार्य विभागाचे सचिव डॉ. किरण कुलकर्णी आणि सांस्कृतिक कार्य संचालनालयाचे संचालक प्रशांत खेडेकर यांच्यासह मराठी नाट्य जगतातील अनेक दिग्गज, नामवंत कलाकार व ज्येष्ठ रंगकर्मी मोठ्या संख्येने उपस्थित होते. मंत्री ॲड. आशिष शेलार यांच्या हस्ते मिळालेल्या या सर्वोच्च सन्मानामुळे क्षितिज इव्हेंटच्या सर्व कलाकार व तंत्रज्ञांचे संपूर्ण राज्यभरातून आणि विशेषतः कोकणातून कौतुकाचा वर्षाव होत आहे. या दैदिप्यमान यशामुळे सावंतवाडीच्या नाट्य चळवळीत एक नवा उत्साह, नवचैतन्य आणि प्रेरणा निर्माण झाली आहे.
