रत्नागिरी नगरपरिषद कार्यालयात २५ नोव्हेंबर रोजी नागरी संरक्षण दलाचे ‘मॉकड्रिल’ आणि ‘ब्लॅक आऊट’ प्रात्यक्षिक

रत्नागिरी : आपत्कालीन परिस्थितीत नागरिकांचे संरक्षण करणे आणि विविध शासकीय व सुरक्षा यंत्रणांमधील समन्वय तपासणे, या उद्देशाने शासनाच्या गृह विभागाअंतर्गत येणाऱ्या नागरी संरक्षण दलाच्या वतीने विशेष सराव अभ्यासाचे (मॉकड्रिल) आयोजन करण्यात आले आहे. येत्या बुधवार, दि. २५ नोव्हेंबर रोजी रत्नागिरी नगरपरिषद कार्यालय येथे हे प्रात्यक्षिक पार पडणार असल्याची माहिती नागरी संरक्षण दलाचे उपनियंत्रक लेफ्टनंट कर्नल चतुर (नि.) यांनी दिली आहे.
असे असेल सराव अभ्यासाचे स्वरूप:
मॉकड्रिल (सराव अभ्यास): दुपारी ३ ते सायंकाळी ५ वाजेपर्यंत.
ब्लॅक आऊट प्रात्यक्षिक: सायंकाळी ६ ते रात्री ८ वाजेपर्यंत.
विविध यंत्रणांचा सहभाग:
या मोहिमेमध्ये जिल्ह्यातील नागरी संरक्षण दलाचे अधिकारी, कर्मचारी आणि स्वयंसेवक यांच्यासह गृहरक्षक दल (होमगार्ड), पोलीस कृतीदल, श्वानपथक, अग्निशमन दल, तटरक्षक दल आणि आपत्ती व्यवस्थापनाचे ‘आपदा मित्र’ सहभागी होणार आहेत. तसेच, तरुणांमध्ये आपत्ती व्यवस्थापनाची जाणीव निर्माण व्हावी यासाठी महाविद्यालयीन विद्यार्थी, एनसीसी (NCC) कॅडेट आणि एनएसएस (NSS) स्वयंसेवक व इतर शासकीय अधिकारी-कर्मचारी या सरावात सक्रिय सहभाग घेणार आहेत.
नागरिकांना सहभागाचे आवाहन:
आपत्तीच्या काळात सतर्क राहणे आणि प्रशासनाला सहकार्य करणे अत्यंत महत्त्वाचे असते. त्यामुळे या सराव अभ्यासाच्या आणि ‘ब्लॅक आऊट’ मोहिमेच्या यशस्वीतेसाठी परिसरातील नागरिकांनी मोठ्या संख्येने सहभागी होऊन प्रशासनाला सहकार्य करावे, असे आवाहन नागरी संरक्षण दलाच्या उपनियंत्रकांनी केले आहे.