खेड (प्रतिनिधी) | ५ ऑगस्ट २०२५
रत्नागिरी जिल्हा काँग्रेसचे माजी अध्यक्ष आणि सहजीवन शिक्षण संस्थेचे अध्यक्ष हिराभाई बुटाला यांचे आज पहाटे पुण्यात निधन झाले. ते काही दिवस आजारी होते आणि त्यांच्यावर उपचार सुरू होते. त्यांच्या निधनाने खेड तालुक्यात हळहळ व्यक्त होत आहे.
हिराभाई बुटाला यांनी खेड शहरात किराणा व्यवसाय सुरू केला होता. त्यानंतर त्यांनी काँग्रेस पक्षात प्रवेश करून राजकारणात सक्रिय भूमिका बजावली. १९८५ ते १९९० या काळात ते रत्नागिरी जिल्हा काँग्रेसचे अध्यक्ष होते. त्यांना नवी दिल्ली येथे प्रियदर्शिनी इंदिरा गांधी पुरस्कार देऊन सन्मानित करण्यात आले होते.
राजकारणाबरोबरच शिक्षण क्षेत्रातही त्यांनी मोठे योगदान दिले. त्यांनी सहजीवन शिक्षण संस्था स्थापन करून खेड शहरात अनेक शाळा व महाविद्यालये सुरू केली. ते सलग ५२ वर्षे संस्थेचे अध्यक्ष राहिले.
त्यांच्या पश्चात दोन मुलगे, सुना, नातवंडे आणि मोठा परिवार आहे. नवी मुंबईतील रेवमॅक्स कंपनीचे मालक कौस्तुभ बुटाला यांचे ते वडील होते.
त्यांच्या निधनानंतर सहजीवन शिक्षण संस्थेच्या सर्व शाखा बंद ठेवण्यात आल्या. त्यांच्या सर्व व्यावसायिक आस्थापनाही आजच्या दिवशी बंद होत्या.
सायंकाळी नेरुळ, नवी मुंबई येथे त्यांच्या पार्थिवावर अंत्यसंस्कार करण्यात आले. या वेळी समाजातील अनेक मान्यवर उपस्थित होते. हिराभाई बुटाला यांच्या जाण्याने खेड तालुक्याने एक अनुभवी, समाजहितासाठी झटणारा नेता गमावला आहे.
