दापोली | प्रतिनिधी :
जागतिक महिला दिनानिमित्त भारतीय जनता पार्टी, दापोली यांच्या वतीने महिलांच्या आरोग्याची काळजी लक्षात घेऊन मोफत रक्त तपासणी शिबिराचे आयोजन करण्यात आले आहे. दापोली परिसरातील महिलांना आरोग्याबाबत जागरूकता निर्माण व्हावी आणि वेळेवर तपासणीची सुविधा उपलब्ध व्हावी, या उद्देशाने हा उपक्रम राबविण्यात येत आहे.
घर आणि कामाच्या जबाबदाऱ्यांमुळे अनेकदा महिलांकडून स्वतःच्या आरोग्याकडे दुर्लक्ष होते. त्यामुळे विविध आजारांचे निदान उशिरा होते. या पार्श्वभूमीवर महिलांनी वेळोवेळी रक्त तपासणी करून आरोग्याची काळजी घ्यावी, यासाठी हे मोफत शिबिर आयोजित करण्यात आले असल्याची माहिती आयोजकांकडून देण्यात आली.
हे शिबिर रविवार, दिनांक ९ मार्च २०२६ रोजी सकाळी ८.०० ते ११.०० या वेळेत भाजप कार्यालय, दापोली येथे होणार असून या शिबिरात महिलांसाठी आवश्यक असलेल्या विविध रक्त तपासण्या मोफत करण्यात येणार आहेत. या तपासण्यांमुळे महिलांना त्यांच्या आरोग्याबाबत योग्य मार्गदर्शन मिळणार आहे.
दापोली तालुक्यातील सर्व महिलांनी या शिबिराचा जास्तीत जास्त लाभ घ्यावा तसेच आपल्या कुटुंबातील आणि परिचयातील महिलांनाही या शिबिराबाबत माहिती द्यावी, असे आवाहन भारतीय जनता पार्टी, दापोली यांच्या वतीने करण्यात आले आहे.
“निरोगी महिला म्हणजे निरोगी कुटुंब आणि निरोगी समाज,” या संदेशासह महिलांनी आपल्या आरोग्याची नियमित तपासणी करून सजग राहावे, असेही आयोजकांनी नमूद केले.
