कोल्हापूर खंडपीठाचा महत्त्वपूर्ण निर्णय
पुरावे ‘चेन ऑफ इव्हेंट’ सिद्ध करण्यात अपयशी
कोल्हापूर खंडपीठाने ७३ वर्षीय चंद्रकांत शेळके या खुनाच्या आरोपीला जामीन मंजूर केला आहे. ७० वर्षीय मोहन पोवार यांच्या हत्येप्रकरणी त्यांच्यावर आरोप ठेवण्यात आला होता. मात्र, तपासात सादर करण्यात आलेले परिस्थितीजन्य पुरावे गुन्ह्याची अखंड साखळी सिद्ध करण्यात अपयशी ठरल्याचे न्यायालयाने नमूद केले. सीसीटीव्ही फुटेज आणि इतर पुरावे एकटे पुरेसे नसल्याचे निरीक्षण नोंदवत न्यायालयाने जामीन मंजूर केला.
कोल्हापूर : मुंबई उच्च न्यायालयाच्या कोल्हापूर खंडपीठाने ७३ वर्षीय चंद्रकांत शेळके यांना जामीन मंजूर केला आहे. त्यांच्यावर ७० वर्षीय मोहन पोवार यांच्या हत्येचा आरोप होता. ही घटना ४ सप्टेंबर २०२५ रोजी कोल्हापूर शहरातील हनुमान नगर परिसरातील राहत्या घरी घडली होती. या प्रकरणात गळा चिरून खून झाल्याची नोंद करण्यात आली होती.
पोलिसांच्या तपासानुसार, आरोपी आणि मृत व्यक्ती हे दीर्घकाळचे मित्र होते. घटनेच्या परिसरातील सीसीटीव्ही फुटेजमध्ये आरोपी दिसत असल्याचा पोलिसांचा दावा आहे. तसेच रक्ताने माखलेले साहित्य जप्त करण्यात आल्याचेही तपासात सांगण्यात आले आहे.
जामीन सुनावणीदरम्यान बचाव पक्षाने हा संपूर्ण खटला परिस्थितीजन्य पुराव्यावर आधारित असल्याचा युक्तिवाद केला. प्रत्यक्षदर्शी साक्षीदार नसल्याचे त्यांनी न्यायालयात मांडले. फिर्यादी पक्षाने मात्र सीसीटीव्ही फुटेज आणि घटनास्थळी आरोपीच्या उपस्थितीवर भर दिला.
न्यायमूर्ती सचिन एस देशमुख यांनी निकालात नमूद केले की, केवळ सीसीटीव्ही फुटेजच्या आधारे आरोपीला कैदेत ठेवणे योग्य नाही. गुन्ह्याचा हेतू किंवा उद्देश स्पष्टपणे सिद्ध झालेला नाही, असेही न्यायालयाने म्हटले. तसेच पुराव्यांची सत्यता अंतिम सुनावणीदरम्यान तपासली जाईल, असे निरीक्षण नोंदवण्यात आले.
न्यायालयाने ५० हजार रुपयांच्या जातमुचलक्यावर चंद्रकांत शेळके यांना जामीन मंजूर केला आहे. प्राथमिक पुरावे असले तरी ते गुन्ह्याची संपूर्ण साखळी सिद्ध करण्यात अपयशी ठरल्याचे न्यायालयाने स्पष्ट केले.
