भारताच्या सर्वात तरुण आंतरराष्ट्रीय क्रिकेटपटूची नवी ओळख
सर्व फॉरमॅटमध्ये चमकण्याची क्षमता असल्याचा डिव्हिलियर्सचा विश्वास
भारताच्या युवा फलंदाज वैभव सूर्यवंशी याच्या आंतरराष्ट्रीय संघातील निवडीचे एबी डिव्हिलियर्स यांनी जोरदार स्वागत केले आहे. निवडकर्त्यांनी अनुभवाऐवजी गुणवत्तेला प्राधान्य देत घेतलेला हा निर्णय योग्य असल्याचे त्यांनी म्हटले. सूर्यवंशीकडे सर्व प्रकारच्या क्रिकेटमध्ये यशस्वी होण्याची क्षमता असल्याचा विश्वासही त्यांनी व्यक्त केला. कसोटी क्रिकेटमध्ये काही आव्हाने असली तरी त्याच्याकडे आवश्यक कौशल्य असल्याचे डिव्हिलियर्सने नमूद केले. आयपीएल 2026 मधील दमदार कामगिरीनंतर सूर्यवंशीची निवड भारतीय क्रिकेटसाठी महत्त्वाची पायरी मानली जात आहे.
नवी दिल्ली : दक्षिण आफ्रिकेचा माजी कर्णधार आणि दिग्गज फलंदाज एबी डिव्हिलियर्स यांनी युवा क्रिकेटपटू वैभव सूर्यवंशी याच्या पहिल्या आंतरराष्ट्रीय निवडीचे समर्थन केले आहे. भारताच्या आयर्लंड आणि इंग्लंड दौऱ्यासह आशियाई क्रीडा स्पर्धेसाठी जाहीर झालेल्या संघात त्याचा समावेश करण्यात आला आहे. अवघ्या 15 वर्षांच्या सूर्यवंशीने या निवडीमुळे इतिहास रचला असून तो भारताकडून निवडला गेलेला सर्वात तरुण आंतरराष्ट्रीय क्रिकेटपटू ठरला आहे. यापूर्वी हा विक्रम सचिन तेंडुलकर यांच्या नावावर होता.
मुंबईतील एका कार्यक्रमात बोलताना डिव्हिलियर्स यांनी निवडकर्त्यांचे कौतुक केले. “हा निर्णय निश्चितच योग्य आहे. अनुभवाचा आधार घेण्याऐवजी प्रतिभेला संधी देणे हे धाडसाचे पाऊल आहे. सूर्यवंशीने आपल्या कामगिरीच्या जोरावर भारतीय टी-20 संघाचे दार उघडले आहे. त्यामुळे त्याची निवड पूर्णपणे योग्य ठरते,” असे त्यांनी सांगितले.
सूर्यवंशीच्या भविष्यासंदर्भात बोलताना डिव्हिलियर्स यांनी त्याच्या क्षमतेवर पूर्ण विश्वास व्यक्त केला. लाल चेंडूच्या क्रिकेटमध्ये तो किती यशस्वी होईल याबाबत निश्चित मत व्यक्त करण्यास त्यांनी टाळले, मात्र त्याच्याकडे सर्व प्रकारच्या क्रिकेटसाठी आवश्यक प्रतिभा असल्याचे नमूद केले. “तो कोणत्या फॉरमॅटवर अधिक लक्ष केंद्रित करतो हे काळच ठरवेल. मात्र त्याच्याकडे मोठा खेळाडू बनण्यासाठी लागणारे गुण निश्चितच आहेत,” असे ते म्हणाले.
कसोटी क्रिकेटमध्ये वेगळी आव्हाने असली तरी सूर्यवंशी त्यांचा सामना करू शकतो, असा विश्वासही डिव्हिलियर्स यांनी व्यक्त केला. “जर त्याने कसोटी क्रिकेट खेळण्याचा मार्ग निवडला, तर त्याच्याकडे आवश्यक तांत्रिक कौशल्य आणि मानसिक ताकद आहे. भविष्यात तो त्या स्तरावरही यशस्वी होईल अशी अपेक्षा आहे,” असे त्यांनी सांगितले.
वैभव सूर्यवंशी याची क्रिकेटमधील झेप अत्यंत वेगवान राहिली आहे. राजस्थान रॉयल्स संघाकडून खेळताना त्याने आयपीएल 2026 मध्ये जबरदस्त कामगिरी केली. त्याने स्पर्धेत 237.30 च्या स्ट्राइक रेटने 776 धावा केल्या आणि विक्रमी 72 षटकार ठोकत सर्वांचे लक्ष वेधून घेतले. याच दमदार प्रदर्शनाच्या जोरावर त्याला भारतीय संघात स्थान मिळाले आहे.
प्रहार डिजिटल
