अखिल भारतीय फुटबॉल महासंघाने (AIFF) इंडियन सुपर लीग (ISL) 4 सप्टेंबरपासून सुरू होणार असल्याची माहिती दिली आहे. विशेष सर्वसाधारण सभेत लीगच्या नव्या क्लब-नेतृत्वाखालील मॉडेलवर चर्चा झाली, मात्र अंतिम निर्णय अद्याप प्रलंबित आहे. AIFF आणि ISL क्लब्समध्ये नव्या आर्थिक व प्रशासकीय व्यवस्थेवर तत्त्वतः सहमती झाल्याचे समोर आले आहे. याशिवाय AIFF चे नाव बदलून ‘फुटबॉल फेडरेशन ऑफ भारत’ (FFB) करण्याचाही प्रस्ताव चर्चेत आला. फुटबॉलच्या आगामी हंगामाबाबत आणि प्रशासकीय सुधारणांबाबत ही बैठक महत्त्वाची ठरली.

4 सप्टेंबरपासून ISL ला सुरुवात; नव्या मॉडेलवर चर्चा

नवी दिल्ली : अखिल भारतीय फुटबॉल महासंघाने (AIFF) शनिवारी झालेल्या विशेष सर्वसाधारण सभेत (SGM) सदस्यांना इंडियन सुपर लीग (ISL) 4 सप्टेंबरपासून सुरू होणार असल्याची माहिती दिली. मात्र, लीगच्या प्रस्तावित क्लब-नेतृत्वाखालील नव्या मॉडेलबाबत कोणताही अंतिम निर्णय घेण्यात आला नाही.

याआधी AIFF ने जीनियस स्पोर्ट्स या व्यावसायिक हक्कांसाठी इच्छुक संस्थेला पत्र पाठवून अंतिम निर्णयास विलंब होत असल्याची माहिती दिली होती. तसेच भारतीय फुटबॉलसाठी स्वतंत्र आर्थिक आणि प्रशासकीय रचना तयार करण्याच्या दिशेने पावले उचलली जात असल्याचेही स्पष्ट करण्यात आले.

गेल्या आठवड्यात केंद्रीय क्रीडा मंत्री मनसुख मांडविया यांच्यासोबत झालेल्या बैठकीत AIFF आणि ISL क्लब्समध्ये नव्या व्यवस्थेबाबत तत्त्वतः सहमती झाल्याचे समोर आले. प्रस्तावित मॉडेलनुसार पुढील चार वर्षांसाठी स्वतंत्र संस्था स्थापन करून लीगचे व्यवस्थापन मुख्यतः क्लब्सच्या नेतृत्वाखाली चालवले जाईल.

या व्यवस्थेत AIFF लॉजिस्टिक्स आणि ऑपरेशनल जबाबदाऱ्या सांभाळणार असून त्यांना दरवर्षी 16 कोटी रुपये मिळणार आहेत. या प्रस्तावाला अद्याप सर्वसाधारण सभेची अधिकृत मंजुरी मिळालेली नाही. पुढील आठवड्यात ISL व्यवस्थापन समिती या विषयावर सविस्तर चर्चा करणार असल्याचे सांगण्यात आले.

AIFF चे नाव बदलण्याचा प्रस्ताव चर्चेत

बैठकीदरम्यान आणखी एक महत्त्वाचा मुद्दा समोर आला. AIFF चे नाव बदलून ‘फुटबॉल फेडरेशन ऑफ भारत’ (FFB) करण्याचा प्रस्ताव चर्चेसाठी मांडण्यात आला. मात्र, हा निर्णय त्वरित लागू होणार नसून त्यासाठी कार्यकारी समितीची मंजुरी आवश्यक आहे. त्यानंतरच हा प्रस्ताव क्रीडा मंत्रालयाकडे पाठवला जाऊ शकतो.

मे महिन्यात कोलकाता येथे झालेल्या मागील SGM मध्ये वेळेअभावी चर्चेला न आलेल्या राष्ट्रीय क्रीडा प्रशासन कायद्याला (NSGA) यावेळी मंजुरी देण्यात आली. त्यानुसार AIFF ला आपल्या घटनेत आवश्यक दुरुस्त्या 30 जूनपर्यंत करण्याची मुदत देण्यात आली आहे.

NSGA अंतर्गत सर्व राष्ट्रीय क्रीडा महासंघांना क्रीडा मंत्रालयाने सुचविलेल्या नवीन प्रशासनिक मार्गदर्शक तत्त्वांचा अवलंब करणे बंधनकारक आहे. त्यामुळे AIFF मध्येही काही महत्त्वपूर्ण बदल अपेक्षित आहेत.

बैठकीत भारतीय फुटबॉल कॅलेंडरवरही चर्चा करण्यात आली. त्यानुसार ड्युरंड कप जुलैच्या अखेरीस सुरू होणार असून त्यानंतर 4 सप्टेंबरपासून ISL चा नवा हंगाम अधिकृतपणे सुरू होणार आहे.

प्रहार डिजिटल