प्रशासनाला जाग कधी येणार? पाऊस थांबला, आता तरी दुरुस्ती करा!
चिपळूण (प्रतिनिधी) : चिपळूण तालुक्याला पश्चिम महाराष्ट्राशी जोडणाऱ्या महत्त्वपूर्ण कुंभार्ली घाटातील रस्त्याची अवस्था अत्यंत दयनीय झाली आहे. घाटातील तब्बल १५ किलोमीटरच्या रस्त्यावर ठिकठिकाणी मोठमोठे खड्डे पडले असून, वाहनचालकांना जीव मुठीत धरून प्रवास करावा लागत आहे. खड्ड्यांमुळे अनेक वाहने नादुरुस्त होत असून, काही वाहने घाटातच बंद पडत असल्याने प्रवाशांना मोठ्या त्रासाला सामोरे जावे लागत आहे. वारंवार उद्भवणाऱ्या या समस्येकडे संबंधित प्रशासनाचे लक्ष कधी जाणार, असा संतप्त सवाल शौकत मुकादम यांनी उपस्थित केला आहे.
कुंभार्ली घाट हा कोकण आणि पश्चिम महाराष्ट्र यांना जोडणारा महत्त्वाचा दळणवळणाचा मार्ग आहे. या मार्गावरून दररोज एसटी बसेस, खासगी प्रवासी वाहने, अवजड मालवाहू ट्रक तसेच पर्यटकांची मोठ्या प्रमाणावर वाहतूक सुरू असते. मात्र, सध्या घाटातील रस्त्याची परिस्थिती पाहता वाहनचालकांना प्रवास करताना मोठी कसरत करावी लागत आहे. रस्त्यावर ठिकठिकाणी पडलेले खोल आणि रुंद खड्डे वाहनांसाठी धोकादायक ठरत आहेत. खड्डे चुकविण्याच्या प्रयत्नात वाहनचालकांना अचानक वाहन वळवावे लागत आहे. त्यामुळे समोरून येणाऱ्या वाहनांशी धडक होण्याची शक्यता निर्माण होत आहे. विशेषतः दुचाकीस्वार आणि लहान वाहनचालकांसाठी हा प्रवास अधिक धोकादायक बनला आहे. खड्ड्यांमुळे वाहनांचे टायर, चाके आणि अन्य यांत्रिक भागांचे नुकसान होत असून, अनेक वाहनांना घाटातच थांबावे लागत आहे. परिणामी वाहतुकीचा खोळंबाही होत आहे.
पावसाचे कारण आता तरी किती दिवस सांगणार?
पावसाळ्यात रस्त्याची दुरवस्था झाल्यानंतर दुरुस्तीच्या कामात पावसाचा अडथळा असल्याचे कारण प्रशासनाकडून पुढे केले जात होते. मात्र, आता पावसाने विश्रांती घेतली आहे. त्यामुळे रस्त्याच्या दुरुस्तीसाठी अनुकूल परिस्थिती असतानाही संबंधित यंत्रणेकडून ठोस कार्यवाही होताना दिसत नाही. पाऊस थांबल्यानंतरही खड्डे बुजविण्याचे काम सुरू होत नसेल, तर प्रशासनाला आता आणखी कोणते कारण सांगायचे आहे, असा प्रश्न उपस्थित होत आहे. याबाबत शौकत मुकादम यांनी तीव्र नाराजी व्यक्त केली आहे.
कुंभार्ली घाटातील तब्बल १५ किलोमीटर रस्त्यावर खड्ड्यांचे साम्राज्य निर्माण झाले आहे. वाहनचालकांचे मोठ्या प्रमाणावर नुकसान होत असून अनेक वाहने घाटातच बंद पडत आहेत. पावसाचे कारण देऊन प्रशासनाने आतापर्यंत वेळ काढली; मात्र आता पाऊसही थांबला आहे. मग रस्त्याची दुरुस्ती सुरू करण्यासाठी आणखी कशाची प्रतीक्षा केली जात आहे? असा सवाल त्यांनी केला.
अपघात झाल्यावरच प्रशासन जागे होणार का?
रस्त्यावरील खड्ड्यांमुळे अपघाताचा धोका वाढला आहे. एखादी गंभीर दुर्घटना घडून निष्पाप प्रवाशांचे जीव गेल्यानंतरच प्रशासनाला जाग येणार आहे का? असा संतप्त सवाल मुकादम यांनी उपस्थित केला. संबंधित विभागाने कोणत्याही दुर्घटनेची वाट न पाहता तातडीने रस्त्याची पाहणी करावी आणि संपूर्ण १५ किलोमीटर मार्गावरील खड्डे बुजविण्याचे काम हाती घ्यावे, अशी मागणी त्यांनी केली. केवळ तात्पुरती मलमपट्टी करून प्रश्न मार्गी लागणार नाही. त्यामुळे रस्त्याची गुणवत्ता लक्षात घेऊन टिकाऊ पद्धतीने दुरुस्ती करणे आवश्यक आहे. तसेच भविष्यात पुन्हा अशी परिस्थिती निर्माण होऊ नये, यासाठी संबंधित विभागाने नियमित देखभाल आणि दुरुस्तीवर लक्ष द्यावे, असेही त्यांनी स्पष्ट केले.
कुंभार्ली घाट हा कोकण आणि पश्चिम महाराष्ट्रातील प्रवासी वाहतूक, व्यापार, उद्योग आणि पर्यटनाच्या दृष्टीने महत्त्वाचा मार्ग आहे. त्यामुळे या मार्गाची सुरक्षितता ही केवळ वाहनचालकांची नव्हे, तर संबंधित प्रशासनाचीही जबाबदारी आहे. आता तरी प्रशासनाने जागे होऊन तातडीने दुरुस्तीचे काम सुरू करावे. अन्यथा एखादी मोठी दुर्घटना घडल्यानंतर जबाबदारी निश्चित करण्याची वेळ येईल, असा इशारा शौकत मुकादम यांनी दिला आहे.
