चिपळूणमध्ये नदी गाळ उपसा मोहिमेला वेग
चिपळूण (प्रतिनिधी) : चिपळूणसह संपूर्ण जिल्ह्यातील नद्यांमधील गाळ काढण्याच्या कामाला आता मोठी गती मिळणार आहे. पालकमंत्री डॉ. उदय सामंत यांच्या अध्यक्षतेखाली चिपळूण येथे पार पडलेल्या महत्त्वपूर्ण बैठकीत वाशिष्ठी नदीतून यावर्षी तब्बल १० लाख क्युबिक मीटर गाळ काढण्याचा निर्णय घेण्यात आला आहे. बैठकीनंतर पत्रकारांशी संवाद साधताना पालकमंत्र्यांनी या निर्णयांची सविस्तर माहिती दिली.
राज्य शासनाने ‘नाम फाउंडेशन’सोबत ३१ रुपये प्रती क्युबिक मीटर दराने सामंजस्य करार (MoU) केला आहे. त्यानुसार, वाशिष्ठी नदीतील १० लाख क्युबिक मीटर गाळ काढण्याची संपूर्ण वर्कऑर्डर शासनाच्या नियमांनुसार नाम फाउंडेशनला देण्याचा निर्णय घेण्यात आला आहे. जिल्ह्यातील ज्या छोट्या आणि नोंद नसलेल्या नद्या आहेत, त्यांच्या गाळ उपशासाठी जिल्हा नियोजन मंडळातून (DPDC) ५ कोटी रुपयांचा निधी मंजूर करण्यात आला आहे. स्थानिक अधिकाऱ्यांनी प्रत्येक तालुक्यातील व मतदारसंघातील प्रत्येकी दोन नद्यांची निवड करावी, असे निर्देश पालकमंत्र्यांनी दिले आहेत. या नद्यांतील गाळही ३१ रुपये प्रती क्युबिक मीटर दरानेच काढला जाईल.
वाशिष्ठीसोबतच जगबुडी, शास्त्री आणि अर्जुना यांसारख्या जिल्ह्यातील सहा मोठ्या नद्यांमधील साचलेला गाळ काढण्यासाठीही एक विशेष मोहीम राबवली जाणार असल्याचे डॉ. सामंत यांनी स्पष्ट केले. या सकारात्मक निर्णयांमुळे जिल्ह्यातील नद्यांचे पुनरुज्जीवन होऊन पूरनियंत्रणास मोठी मदत होईल, असा विश्वास पालकमंत्र्यांनी यावेळी व्यक्त केला.













