चांदोली | सह्याद्री व्याघ्र प्रकल्पातील चांदोली येथील झोलंबी जंगल सफारी मार्गावर सोमवारी, २० जानेवारी रोजी संध्याकाळी सुमारे ४ ते ५ वाजेच्या दरम्यान एका भाग्यवान पर्यटकाला वाघिण ‘तारा’चे सुंदर दर्शन घडले. जंगलाच्या वाटेवर निवांतपणे फिरत असलेली तारा जवळपास १० मिनिटांहून अधिक काळ पर्यटकांच्या नजरेसमोर होती. तिच्या डौलदार चालण्याने आणि आत्मविश्वासपूर्ण हालचालींनी हा अनुभव सर्वांसाठी अविस्मरणीय ठरला.
‘तारा’ ही वाघिण नुकतीच सह्याद्री व्याघ्र प्रकल्पात आणण्यात आली आहे. तिला ताडोबा-आंधारी व्याघ्र प्रकल्पातून येथे स्थलांतरित करण्यात आले असून, यापूर्वी तिचे नाव ‘चंदा’ होते. वन विभागाने काळजीपूर्वक तयारी करून तिला या जंगलात सोडले आहे. तिच्या हालचालींवर लक्ष ठेवण्यासाठी रेडिओ कॉलरही बसवण्यात आला आहे.
सह्याद्री व्याघ्र प्रकल्पात वाघांचे अस्तित्व वाढावे आणि जंगलाचा नैसर्गिक समतोल टिकून राहावा, यासाठी हे स्थलांतर करण्यात आले आहे. तारा लवकरच या परिसराशी जुळवून घेत असल्याचे तिच्या मुक्त संचारातून दिसून येत आहे.
अशा प्रकारचे थेट वन्यजीव दर्शन हे जंगलाच्या समृद्धीचे आणि संरक्षणाच्या यशाचे प्रतीक मानले जाते. निसर्गप्रेमी आणि पर्यटकांनी सह्याद्री व्याघ्र प्रकल्पाला भेट देऊन अशा खास अनुभवांचा आनंद घ्यावा, असे आवाहन वन विभागाकडून करण्यात येत आहे.
