दापोली प्रतिनिधी : पाण्याचे महत्त्व अधोरेखित करत जलसंपत्तीच्या संवर्धनाचा संदेश देण्यासाठी साजरा केला जाणारा World Water Day (जागतिक जल दिन) यंदाही उत्साहात साजरा होणार असून, या निमित्ताने निवेदिता प्रतिष्ठान, जालगाव (ता. दापोली) यांच्या वतीने जलपूजनाचा विशेष कार्यक्रम आयोजित करण्यात आला आहे. रविवार, २२ मार्च २०२६ रोजी सायंकाळी ५ ते ७ या वेळेत जालगाव येथील भारतरत्न पां.वा.काणे स्मारक येथे हा कार्यक्रम पार पडणार आहे.
पाण्याचे वाढते दुर्भिक्ष, जलप्रदूषण आणि भविष्यातील संभाव्य संकटे लक्षात घेता समाजामध्ये जनजागृती होणे अत्यंत आवश्यक आहे. या पार्श्वभूमीवर जलसंवर्धनाचा संदेश प्रभावीपणे पोहोचवण्यासाठी या कार्यक्रमाचे आयोजन करण्यात आले असल्याची माहिती प्रतिष्ठानतर्फे देण्यात आली.
या उपक्रमाचे प्रमुख आकर्षण म्हणजे श्री क्षेत्र केशवराज येथून आणण्यात येणाऱ्या शुद्ध, निर्मळ पाण्याच्या कलशाचे विधिवत पूजन होय. पारंपरिक पद्धतीने होणाऱ्या या जलपूजनातून पाण्याबद्दल आदर, कृतज्ञता आणि संवर्धनाची भावना जागृत करण्याचा प्रयत्न केला जाणार आहे.
याशिवाय, सध्याच्या जलस्थितीचे वास्तव दर्शन घडवणारे डिजिटल प्रदर्शनही या ठिकाणी मांडण्यात येणार आहे. यात पाण्याचे घटते स्रोत, भूजल पातळीतील घसरण, तसेच वाढते प्रदूषण यांची माहिती चित्रफिती व माहितीफलकांच्या माध्यमातून नागरिकांसमोर मांडली जाणार आहे. तसेच, पारंपरिक जलव्यवस्थापन पद्धतींची ओळख करून देणारे पुराणवस्तू प्रदर्शनही आयोजित करण्यात आले असून, पूर्वीच्या काळात पाण्याचा काटकसरीने वापर कसा केला जात होता याचे दर्शन यातून घडणार आहे.
हा कार्यक्रम केवळ धार्मिक किंवा सांस्कृतिक उपक्रम न राहता सामाजिक जाणीव निर्माण करणारा ठरणार असल्याचे आयोजकांनी सांगितले. विशेषतः युवकांनी आणि विद्यार्थ्यांनी या कार्यक्रमात सहभागी होऊन जलसंवर्धनाची जबाबदारी ओळखावी, असा संदेशही देण्यात आला आहे.
या जलपूजन सोहळ्याचा लाभ जास्तीत जास्त नागरिकांनी घ्यावा, पाण्याचे महत्त्व जाणून घ्यावे आणि दैनंदिन जीवनात पाणी बचतीचे उपाय अवलंबावेत, असे आवाहन निवेदिता प्रतिष्ठानचे अध्यक्ष डॉ. प्रशांत परांजपे व संयोजन समितीच्या वतीने करण्यात आले आहे.
