दोडामार्ग: सुहास देसाई :दोडामार्ग ते तिलारी रस्त्यावरील सुशीला हॉल नजीक असलेल्या एका काजू बागेला आज दुपारी अचानक भीषण आग लागली. या आगीमुळे परिसरात आणि मुख्य रस्त्यावर धुराचे लोट पसरल्याने वाहनधारकांची मोठी ओढाताण झाली. दरम्यान, दोडामार्ग नगरपंचायतीच्या अग्निशमन दलाने तातडीने घटनास्थळी दाखल होत आग विझवल्याने मोठा अनर्थ टळला असला, तरी या आगीत काजू बागेचे लाखो रुपयांचे नुकसान झाले आहे.
रस्त्यावर धुराचे साम्राज्य
दुपारच्या सुमारास काजू बागेतून आगीच्या ज्वाळा बाहेर येऊ लागल्या. वाळलेल्या पालापाचोळ्यामुळे आगीने रौद्र रूप धारण केले होते. या आगीचा धूर थेट मुख्य रस्त्यावर आल्याने काही काळ वाहतुकीला अडथळा निर्माण झाला होता. भरवस्तीत आणि रस्त्यालगतच ही आग लागल्याने परिसरात भीतीचे वातावरण पसरले होते.
अग्निशमन दलाची धाव
घटनेची माहिती मिळताच दोडामार्ग नगरपंचायतीच्या अग्निशमन दलाच्या पथकाला पाचारण करण्यात आले. अग्निशमन दलाच्या जवानांनी विलंब न करता घटनास्थळी धाव घेतली आणि आग आटोक्यात आणण्यासाठी युद्धपातळीवर प्रयत्न सुरू केले. जवानांच्या अथक परिश्रमानंतर ही आग पूर्णपणे विझवण्यात यश आले.
लाखो रुपयांचे नुकसान
अग्निशमन दलाने वेळीच हस्तक्षेप केल्यामुळे ही आग आजूबाजूच्या परिसरात पसरली नाही आणि मोठी जीवितहानी किंवा इतर मालमत्तेचे नुकसान टळले. मात्र, काजू बागेतील झाडे मोठ्या प्रमाणात जळाल्याने संबंधित शेतकऱ्याचे लाखो रुपयांचे आर्थिक नुकसान झाले आहे. ऐन काजू हंगामात ही घटना घडल्याने हळहळ व्यक्त केली जात आहे. ही आग नेमकी कशामुळे लागली, याचे कारण अद्याप स्पष्ट होऊ शकलेले नाही.
