श्री सद्गुरू संगीत विद्यालयाचा अमृतमहोत्सवी उपक्रम
सावंतवाडी । प्रतिनिधी : येथील प्रतिथयश ‘श्री सद्गुरू संगीत विद्यालय, सावंतवाडी’ यांच्या अमृतमहोत्सवी वर्षानिमित्त आयोजित प्रतिमासिक संगीत सभेअंतर्गत एका सुरेल सांगीतिक कार्यक्रमाचे आयोजन करण्यात आले आहे. ज्येष्ठ संगीतकार श्रीनिवास खळे यांच्या अजरामर व भावमधुर गीतांवर आधारित ‘घन बरसत बरसत आले’ हा विशेष संगीत सोहळा रसिकांच्या भेटीस येत आहे.
हा कार्यक्रम शनिवार, २७ जून २०२६ रोजी सायंकाळी ५ वाजता सावंतवाडी येथील आर. पी. डी. हायस्कूल सभागृहात संपन्न होणार आहे. भारतरत्न लता मंगेशकर यांच्या सुरावटींनी सजलेल्या आणि खळे अण्णांच्या जादुई संगीताने नटलेल्या अजरामर गीतांचा एक नितांत देखणा आणि सुरेल आविष्कार या निमित्ताने कोकणातील रसिकश्रोत्यांना अनुभवायला मिळणार आहे.
या सांगीतिक कार्यक्रमाची निर्मिती व संकल्पना निलेश मेस्त्री यांची असून, श्री सद्गुरू संगीत विद्यालयाच्याच यशस्वी व गुणवंत विद्यार्थ्यांनी या कार्यक्रमाचे सादरीकरण नटवले आहे. आपल्या शिष्यांच्या स्वरांनी गुरुवर्यांना आदरांजली वाहण्याचा हा एक अभिनव प्रयत्न आहे.
पावसाच्या आगमनासोबतच स्वरांच्या या अमृतधारांमध्ये न्हाऊन निघण्यासाठी सावंतवाडी व परिसरातील तमाम संगीतप्रेमींनी, रसिकांनी या सुवर्णमयी सांगीतिक संध्येला आवर्जून उपस्थित राहावे आणि या सांगीतिक मेजवानीचा आस्वाद घ्यावा, असे भावपूर्ण आवाहन आयोजकांच्या वतीने करण्यात आले आहे.
