१५ वर्षीय आर्यन खेडेकरचा ८१ किमी जलतरणात ऐतिहासिक पराक्रम; ११ तास ३४ मिनिटांत खडतर अंतर पार
खेड (प्रतिनिधी) : रत्नागिरी जिल्ह्यातील खेड तालुक्यातील उधळे बुद्रुक येथील अवघ्या १५ वर्षीय आर्यन राजेश खेडेकर याने पश्चिम बंगालमधील भागीरथी नदीत आयोजित खुल्या जलतरण स्पर्धेत तब्बल ८१ किलोमीटरचे अंतर अवघ्या ११ तास ३४ मिनिटांत पार करून ऐतिहासिक कामगिरी केली आहे. त्याच्या या उल्लेखनीय पराक्रमामुळे खेडसह संपूर्ण रत्नागिरी जिल्ह्याचे आणि महाराष्ट्राचे नाव क्रीडा क्षेत्रात उज्ज्वल झाले आहे.
भागीरथी नदीच्या प्रवाहात पार पडलेल्या या अत्यंत खडतर जलतरण स्पर्धेत आर्यनने प्रतिकूल प्रवाह, थंडी, शारीरिक थकवा आणि दीर्घकाळ पोहण्याचे आव्हान यांवर मात करत आपली जिद्द आणि चिकाटी सिद्ध केली. विशेष म्हणजे, अवघ्या १५व्या वर्षी एवढे प्रदीर्घ अंतर पूर्ण करत आर्यनने या प्रतिष्ठित स्पर्धेतील सर्वात तरुण जलतरणपटू म्हणून आपली वेगळी ओळख निर्माण केली आहे.
सलग ११ तास ३४ मिनिटे नदीच्या प्रवाहात पोहत ८१ किलोमीटरचे अंतर पूर्ण करणे ही अत्यंत कठीण आणि आव्हानात्मक कामगिरी मानली जाते. कठोर सराव, आत्मविश्वास आणि प्रबळ इच्छाशक्तीच्या जोरावर आर्यनने हे आव्हान यशस्वीपणे पूर्ण केले. ग्रामीण भागातून आलेल्या या युवा जलतरणपटूच्या कामगिरीने क्रीडाप्रेमींचे विशेष लक्ष वेधून घेतले आहे.
आर्यनच्या या अभूतपूर्व यशाबद्दल राज्यमंत्री मा. नामदार योगेशदादा कदम यांनी त्याचा स्नेहपूर्वक सत्कार करून भावी वाटचालीस मनःपूर्वक शुभेच्छा दिल्या. आर्यनचे हे यश संपूर्ण महाराष्ट्रासाठी अत्यंत अभिमानास्पद असून त्याची कामगिरी राज्यातील तरुणांसाठी प्रेरणादायी असल्याचे योगेशदादा कदम यांनी यावेळी सांगितले.
उधळे बुद्रुकसारख्या ग्रामीण भागातून येऊन आर्यनने आपल्या कर्तृत्वाच्या जोरावर जागतिक स्तरावरील स्पर्धेत उल्लेखनीय कामगिरी केली आहे. त्याच्या या यशामुळे खेडवासीयांच्या शिरपेचात मानाचा तुरा रोवला गेला असून आर्यनवर सर्व स्तरातून अभिनंदनाचा वर्षाव होत आहे. भविष्यातही आर्यनने जलतरण क्षेत्रात अशीच दमदार कामगिरी करून देशाचे नाव उज्ज्वल करावे, अशा शुभेच्छा त्याला दिल्या जात आहेत.
