सुनेने लाकडी दांडक्याने मारहाण केल्याचा होता आरोप; उपचारादरम्यान मृत्यू झाल्याने परिसरात हळहळ
देवरूख (प्रतिनिधी):
संगमेश्वर तालुक्यातील नायरी येथे ९१ वर्षीय वृद्ध महिलेला लाकडी दांडक्याने आणि हाताबुक्क्यांनी मारहाण केल्याच्या कथित घटनेला आता दुर्दैवी वळण मिळाले आहे. या मारहाणीचा आरोप असलेल्या वृद्ध महिलेचा अखेर मृत्यू झाला आहे. या घटनेमुळे नायरी परिसरात हळहळ व्यक्त होत असून वृद्धांच्या सुरक्षिततेचा प्रश्न पुन्हा ऐरणीवर आला आहे.
मिळालेल्या माहितीनुसार, जलेखा इसाक मोडक (वय ९१, रा. नायरी, ता. संगमेश्वर) यांना २९ ऑक्टोबर २०२६ रोजी सायंकाळी ४ ते ५.३० वाजण्याच्या सुमारास राहत्या घरी मारहाण झाल्याचा आरोप करण्यात आला होता. वृद्ध महिलेची देखभाल करावी लागत असल्याच्या तसेच त्यांना कुठेही फिरायला जाता येत नसल्याच्या कारणावरून त्यांची सून नाशिरा अस्लम मोडक हिने लाकडी दांडक्याने आणि हाताबुक्क्यांनी मारहाण केल्याची तक्रार करण्यात आली होती. या मारहाणीत वृद्ध महिलेच्या उजव्या गुडघ्याला, डाव्या पायाला तसेच उजव्या मनगटाला दुखापत झाल्याचे तक्रारीत नमूद करण्यात आले होते. याप्रकरणी वृद्धेची मुलगी जैबुनिसा निजामुद्दीन लांबे (वय ६०, रा. नेरूळ, नवी मुंबई) यांनी पनवेल येथे पोलिसांत तक्रार दाखल केली होती. त्यानुसार नाशिरा मोडक हिच्याविरोधात गुन्हा नोंदविण्यात आला होता.
मात्र, या घटनेनंतर जखमी झालेल्या जलेखा मोडक यांचा अखेर मृत्यू झाला. त्यांच्या मृत्यूमुळे या प्रकरणाचे गांभीर्य अधिक वाढले आहे. वृद्ध महिलेचा मृतदेह अंत्यविधीसाठी नायरी येथे आणण्यात येणार असल्याची माहिती मिळाली आहे. वृद्धापकाळात आई-वडिलांना आधार, माया आणि सुरक्षिततेची सर्वाधिक गरज असते. अशा वयात त्यांच्यावर मारहाणीचा आरोप होणे आणि त्यानंतर त्यांचा मृत्यू होणे ही अत्यंत वेदनादायी बाब आहे. या मृत्यूचे मारहाणीशी वैद्यकीयदृष्ट्या काही संबंध आहे का, हे शवविच्छेदन अहवाल आणि पोलिस तपासातून स्पष्ट होणे महत्त्वाचे ठरणार आहे. दरम्यान, वृद्ध महिलेच्या मृत्यूमुळे या प्रकरणात पुढे कोणती कायदेशीर कारवाई होते, याकडे सर्वांचे लक्ष लागले आहे.
