कर्तव्यावर असलेल्या चालक-वाहकांच्या चेहऱ्यावर फुलवला आनंद; दरवर्षीच्या उपक्रमाचे कर्मचारी व तालुक्यातून कौतुक
मंडणगड प्रतिनिधी : सण-उत्सव म्हटले की प्रत्येकाला आपल्या कुटुंबीयांसमवेत आनंदाचे क्षण घालवण्याची इच्छा असते. मात्र, सार्वजनिक वाहतूक व्यवस्था अखंडित सुरू ठेवण्यासाठी एसटी महामंडळाच्या कर्मचाऱ्यांना अनेकदा सणासुदीच्या दिवशीही कर्तव्य बजावावे लागते. प्रवाशांचा प्रवास सुखकर व्हावा, यासाठी आपल्या सणांचा आनंद बाजूला ठेवून सेवा देणाऱ्या अशाच कर्मचाऱ्यांची दिवाळी गोड करण्याचा संवेदनशील उपक्रम मंडणगड एसटी आगाराचे आगार व्यवस्थापक मदनीपाशा जुनैदी यांनी राबविला.
दिवाळीच्या सणानिमित्त मंडणगड आगारात कर्तव्यावर असलेल्या तसेच कामाच्या वेळापत्रकामुळे आगारात विश्रांतीसाठी थांबलेल्या चालक व वाहकांना जुनैदी यांनी स्वतःच्या खर्चातून दिवाळी फराळाचे वाटप केले. दिवाळीच्या धामधुमीत घरापासून दूर राहून प्रवाशांच्या सेवेसाठी तत्पर असलेल्या कर्मचाऱ्यांना या उपक्रमामुळे सणाचा आनंद आगारातच अनुभवता आला.
एसटी महामंडळाची सेवा ही अत्यावश्यक सार्वजनिक सेवा असल्याने दिवाळीसारख्या महत्त्वाच्या सणालाही अनेक चालक व वाहकांना आपले कर्तव्य पार पाडावे लागते. प्रवाशांची गैरसोय होऊ नये, यासाठी ते अहोरात्र कार्यरत असतात. अशा कर्मचाऱ्यांच्या कष्टांची जाणीव ठेवत आगार व्यवस्थापक जुनैदी यांनी फराळ वाटपाच्या माध्यमातून त्यांच्याप्रती आपुलकी आणि कृतज्ञतेची भावना व्यक्त केली. विशेष म्हणजे, हा उपक्रम केवळ यंदापुरता मर्यादित नसून आगार व्यवस्थापक मदनीपाशा जुनैदी हे दरवर्षी स्वखर्चाने दिवाळी फराळ वाटप करीत असतात. प्रशासकीय जबाबदारी सांभाळतानाच आपल्या सहकाऱ्यांच्या आनंदाची काळजी घेणारा अधिकारी म्हणून त्यांच्या या कृतीकडे पाहिले जात आहे.
एखाद्या कर्मचाऱ्याला केवळ कामाची जबाबदारी देणे महत्त्वाचे नसते, तर त्याच्या सुख-दुःखात सहभागी होऊन त्याला आपलेपणाची जाणीव करून देणेही तितकेच महत्त्वाचे असते. जुनैदी यांच्या या छोटेखानी; मात्र मनाला स्पर्श करणाऱ्या उपक्रमातून अधिकारी आणि कर्मचारी यांच्यातील जिव्हाळ्याचे नाते अधोरेखित झाले आहे.
त्यांच्या या उपक्रमामुळे चालक व वाहकांच्या चेहऱ्यावर समाधानाचे हास्य फुलले असून, मंडणगड एसटी आगारातील कर्मचारी वर्गातून तसेच तालुक्यातून आगार व्यवस्थापक मदनीपाशा जुनैदी यांच्या सामाजिक जाणिवेचे आणि सहृदयतेचे कौतुक होत आहे.
कर्तव्याच्या धावपळीतही माणुसकीचा गोडवा जपणारा हा उपक्रम खऱ्या अर्थाने दिवाळीच्या आनंदाला अधिक अर्थपूर्ण करणारा ठरला आहे.
