वनविभाग आणि ग्रामस्थांच्या समन्वयातून बचावकार्य
चिपळूण । प्रतिनिधी : चिपळूण तालुक्यातील ओवळी येथील बौद्धवाडीत एका बिबट्याने विलास मोहिते यांच्या गुरांच्या गोठ्यात आश्रय घेतल्याची घटना समोर आली होती. सुमारे पाच दिवसांच्या प्रयत्नांनंतर, वनविभाग आणि स्थानिक ग्रामस्थांच्या समन्वयाने या बिबट्याला सुरक्षितरित्या पकडण्यात यश आले असून, उपचारासाठी त्याला पुण्याला पाठवण्यात आले आहे.
दिनांक ६ जुलै, २०२५ रोजी श्री. मोहिते यांनी वनविभागाला आपल्या गोठ्यात बिबट्या येत असल्याची माहिती दिली.
चिपळूण वनपाल एस.एस. सावंत, वनरक्षक कृष्णा इरमले आणि राहुल गुंठे यांनी तात्काळ घटनास्थळी पाहणी केली. सुरुवातीला बिबट्याला हुसकावून लावण्याचे प्रयत्न झाले, मात्र तो वारंवार त्याच ठिकाणी येत असल्याचे निदर्शनास आले.
अशक्त बिबट्याला उपचाराची गरज
निरीक्षणानंतर, हा बिबट्या अशक्त आणि आजारी असल्याचे स्पष्ट झाले. वनविभागाने गोठ्याभोवती ट्रॅप कॅमेरे आणि भक्ष्य ठेवून पिंजरा लावला, परंतु बिबट्या पिंजऱ्यात न अडकता थेट गोठ्यातच येत राहिला.
वनविभागाची प्रभावी रणनीती
परिस्थितीचे गांभीर्य लक्षात घेऊन, दिनांक ११ जुलै, २०२५ रोजी रत्नागिरी (चिपळूण) च्या विभागीय वन अधिकारी श्रीम. गिरिजा देसाई यांच्या सूचनेनुसार, सहाय्यक वन संरक्षक श्रीम. प्रियंका लगड यांनी स्वतः पाहणी केली. त्यांनी पिंजऱ्याची जागा बदलून तो थेट गोठ्यातच ठेवण्याचा निर्णय घेतला. या प्रभावी रणनीतीमुळे, त्याच रात्री ८:३० वाजता बिबट्या पिंजऱ्यात अडकला.
जखमी बिबट्या उपचारासाठी पुण्याला
पकडण्यात आलेला बिबट्या नर जातीचा असून, अंदाजे ४ ते ५ वर्षांचा पूर्ण वाढ झालेला आहे. त्याच्या मानेवर जखम असल्याचे आढळून आले. श्रीम. गिरिजा देसाई यांनी पाहणी केल्यानंतर, या जखमी बिबट्याला तात्काळ वनविभागाच्या अँब्युलन्सने पुणे येथील रेस्क्यू ट्रान्सीट ट्रीटमेंट सेंटर येथे पुढील उपचारांसाठी रवाना करण्यात आले आहे.
बचावकार्यात सर्वांचा सहभाग
हे बचाव कार्य श्रीम. गिरिजा देसाई यांच्या मार्गदर्शनाखाली श्रीम. प्रियंका लगड, आर.एस. परदेशी (वन परिक्षेत्र अधिकारी), श्री. एस.एस. सावंत (वनपाल), श्री. सुरेश उपरे (वनपाल), श्री. कृष्णा इरमले (वनरक्षक), श्री. राहुल गुंठे (वनरक्षक) आणि श्री. नंदकुमार कदम (वाहन चालक) यांनी यशस्वीरित्या पार पाडले.
याशिवाय, ओवळी गावचे पोलिस पाटील श्री. अजिंक्य शिंदे आणि ग्रामस्थ शुभंम रवींद्र शिंदे, वेदांत प्रकाश शिंदे, उदय शिवाजी कदम, दशरथ रामचंद्र शिंदे, सुजल प्रफुल शिंदे, आर्यन संतोष घाग, सुजल राजेश शिंदे, धावू कानू शेळके, मुंकुद सुरेश हिलम, संदीप सावंत, गोठा मालक श्री. विलास शिंदे आणि श्री. सुरेश शिंदे यांनी या बचावकार्यात मोलाची मदत केली. वनविभाग आणि ग्रामस्थांच्या या यशस्वी समन्वयामुळे बिबट्याचे प्राण वाचले असून, या घटनेने वन्यजीव संरक्षणाचे महत्त्व अधोरेखित झाले आहे.
