चिपळूण (वार्ताहर) : हरितक्रांतीचे जनक भारतरत्न डॉ. एम. एस. स्वामीनाथन यांच्या कार्याला अभिवादन म्हणून, डॉ. बाळासाहेब सावंत कोकण कृषी विद्यापीठ अंतर्गत डॉ. तानाजीराव चोरगे शिक्षण व संशोधन संस्था संचलित गोविंदरावजी निकम कृषी महाविद्यालयातील विद्यार्थ्यांनी एक अनोखा उपक्रम राबवला. रामपूर येथील जिल्हा परिषद प्राथमिक शाळेत त्यांनी ‘शाश्वत शेती दिन’ साजरा करत भावी पिढीला पर्यावरणाची आणि शेतीची जाणीव करून दिली.
राज्यशासनाने डॉ. एम. एस. स्वामीनाथन यांच्या जन्मशताब्दी वर्षाचे औचित्य साधून, त्यांचा जन्मदिवस ७ ऑगस्ट हा ‘शाश्वत शेती दिन’ म्हणून घोषित केला आहे. या निर्णयाला सलाम करत, महाविद्यालयाच्या ‘जय किसान ग्रुप’च्या कृषी दूतांनी थेट शाळेत जाऊन मुलांशी संवाद साधला. त्यांनी विद्यार्थ्यांना सोप्या भाषेत शाश्वत शेती म्हणजे काय, तिचे फायदे आणि पर्यावरणाचे संरक्षण करण्यात तिची भूमिका समजावून सांगितली. स्वामीनाथन यांचे योगदान: एक प्रेरणादायी गाथा यावेळी कृषी दूतांनी डॉ. स्वामीनाथन यांच्या अतुलनीय योगदानाला उजाळा दिला. त्यांनी देशातील अन्नसुरक्षा सुनिश्चित करण्यासाठी केलेले कार्य आणि हरितक्रांतीतून देशाचे चित्र कसे बदलले, याची माहिती दिली. या माहितीने विद्यार्थ्यांच्या मनात कुतूहल निर्माण झाले आणि त्यांनी अनेक प्रश्न विचारत सक्रिय सहभाग घेतला.
या कार्यक्रमाला मुख्याध्यापक, शिक्षक आणि सर्व विद्यार्थ्यांची उपस्थिती लाभली. कार्यक्रमाचा समारोप आनंददायी वातावरणात खाऊ वाटप करून करण्यात आला, ज्यामुळे मुलांच्या चेहऱ्यावर हसू फुलले. या यशस्वी उपक्रमासाठी कृषीभूषण डॉ. तानाजीराव चोरगे शिक्षण व संशोधन संस्थेचे मुख्य कार्यकारी अधिकारी डॉ. निखिल चोरगे, प्राचार्य डॉ. संकेत कदम, प्राचार्या डॉ. शमिका चोरगे आणि समन्वयक प्रा. प्रशांत इंगवले यांचे मार्गदर्शन लाभले. तसेच कृषीदूत तेजस चोथे, वैभव पवळ, विराज कणसे, उदयनराजे भोसले, प्रतिक माळी, भारतकुमार बिराजदार, मंगेश पिसे, ओंकार भापकर आणि तुषार भाबड यांनी विशेष परिश्रम घेतले.
