मायेने मिरची, कोथिंबीर आणि आले देणारी प्रेमळ आजी हरपली
निलेश जाधव / देवरूख:
संगमेश्वर तालुक्यातील देवरूख शहरात मुकुंद जोशी यांच्या हाँटेलशेजारी भाजी विक्री करणाऱ्या आणि आपल्या साध्या, प्रेमळ स्वभावामुळे ग्राहकांच्या मनात विशेष स्थान निर्माण केलेल्या ‘पांढरी आजी भाजीवाली’ यांचे निधन झाले आहे. त्यांच्या निधनामुळे देवरूखमधील भाजी खरेदी करणाऱ्या ग्राहकांमध्ये आणि त्यांच्याशी जिव्हाळ्याचे संबंध निर्माण झालेल्या नागरिकांमध्ये हळहळ व्यक्त होत आहे. भाजी विक्रीच्या व्यवसायातून केवळ उदरनिर्वाह न करता माणुसकीचे नाते जपणाऱ्या या आजींच्या आठवणी आता अनेकांच्या मनात कायमच्या घर करून राहणार आहेत.
देवरूखमध्ये भाजी विक्री करणाऱ्या पांढरी आजी यांची ओळख त्यांच्या भाजीपुरती मर्यादित नव्हती. त्यांच्या प्रेमळ बोलण्यामुळे, आपुलकीच्या वागण्यामुळे आणि ग्राहकांशी असलेल्या जिव्हाळ्याच्या नात्यामुळे त्या अनेकांच्या परिचयाच्या झाल्या होत्या. त्यांच्याकडून भाजी खरेदी करण्यासाठी येणाऱ्या ग्राहकांना त्या केवळ विक्रेती म्हणून नव्हे, तर घरातील एखाद्या ज्येष्ठ व्यक्तीप्रमाणे आपुलकीची वागणूक देत असत. पांढरी आजी यांच्या स्वभावातील सर्वांत खास गोष्ट म्हणजे ग्राहकाने भाजी खरेदी केल्यानंतर त्या आवर्जून मिरची, कोथिंबीर आणि आले फुकट देत असत. आजच्या काळात प्रत्येक वस्तूचा हिशेब ठेवला जात असताना, भाजी घेतलेल्या ग्राहकाला या छोट्या-छोट्या गोष्टी प्रेमाने देण्याची त्यांची सवय अनेकांसाठी आनंदाची बाब होती.
ग्राहकाने कितीही कमी भाजी घेतली, तरी त्याच्याशी आपुलकीने बोलणे, हसतमुखाने व्यवहार करणे आणि भाजीसोबत मिरची, कोथिंबीर व आले देणे, यातून त्यांच्या मनातील प्रेम आणि माणुसकी दिसून येत असे. या वस्तूंची किंमत कदाचित फार मोठी नव्हती; मात्र त्यामागील भावना अनमोल होती. त्यामुळेच पांढरी आजी यांच्याकडून भाजी घेणाऱ्या अनेक ग्राहकांच्या मनात त्यांच्याविषयी एक वेगळे स्थान निर्माण झाले होते. आज पांढरी आजी आपल्यात नसल्या, तरी त्यांनी जपलेली आपुलकी आणि ग्राहकांशी निर्माण केलेले जिव्हाळ्याचे नाते अनेकांच्या स्मरणात राहील. भाजीसोबत मिरची, कोथिंबीर आणि आले देणाऱ्या पांढरी आजींच्या हातातील ती माया आता पुन्हा अनुभवता येणार नाही. मात्र त्यांच्या प्रेमळ स्वभावाच्या आठवणी देवरूखवासियांसह आजुबाजुच्या गावातील नागरिकांच्या मनात कायम जिवंत राहतील.
