राजापूर वरचीपेठ येथील अमृत तांबडे ‘महाराष्ट्र बिझनेस आयकॉन’ पुरस्काराने सन्मानित
राजापूर (वार्ताहर): राजापूर येथील जेम्स अँड एस्ट्रोलॉजी, ज्योतिष तज्ञ अमृत तांबडे यांच्या कार्याची दखल घेत त्यांना ‘महाराष्ट्र बिझनेस आयकॉन २०२५’, ‘महाराष्ट्र स्टाईल आयकॉन २०२५’ आणि ‘महाराष्ट्र फॅशन आयकॉन २०२५’ या प्रतिष्ठित पुरस्कारांनी सन्मानित करण्यात आले. हा सन्मान Reseal.in आणि इंडिया फॅशन आयकॉन मॅगझिन यांच्या वतीने नुकताच पुणे येथे प्रदान करण्यात आला. महाराष्ट्रातील उदयोन्मुख उद्योजक आणि सर्जनशील व्यक्तिमत्त्वांचा गौरव यावेळी करण्यात आला.
समर्पण, चिकाटी आणि खोल आध्यात्मिक निष्ठेच्या बळावर अमृत जेम्सचे संस्थापक अमृत अनंत तांबडे यांनी आपली कारकीर्द घडवली आहे. आज त्यांच्या कार्याचा ठसा केवळ महाराष्ट्रापुरता मर्यादित न राहता देशभर तसेच परदेशातील अनेक देशांमध्ये उमटलेला दिसतो. वैयक्तिक, व्यावसायिक आणि ज्योतिषविषयक अडचणींवर मार्गदर्शनासाठी असंख्य ग्राहक त्यांच्याकडे नियमितपणे येतात. व्यवसायातील अपयश, विवाहातील अडथळे, कौटुंबिक तणाव अशा विविध समस्यांवर मार्गदर्शन घेतल्यानंतर अनेक ग्राहक समाधान व्यक्त करत असल्याचे तांबडे सांगतात.
या क्षेत्रात काम करताना अनेक आव्हानांचा सामना करावा लागतो, असेही ते प्रामाणिकपणे नमूद करतात. काही ग्राहक उपाय मिळाल्यानंतर कृतज्ञता व्यक्त करतात, तर काहीजण केवळ अडचणीच्या वेळीच संपर्क साधतात. काहीजण प्रगतीची माहिती देतात, तर काही सेवा घेतल्यानंतर आर्थिक व्यवहारात टाळाटाळ करतात. तरीही रत्न, ज्योतिष आणि उपाययोजनांबाबत प्रामाणिक व जबाबदार मार्गदर्शन देण्याचा आपला संकल्प कायम असल्याचे तांबडे ठामपणे सांगतात.
रत्न उद्योगात प्रवेश करण्याचे श्रेय ते आपले गुरु, पुण्यातील पुष्कर दिनकर अष्टेकर यांना देतात. प्रवासाच्या सुरुवातीच्या टप्प्यात अष्टेकर यांनी दिलेले मार्गदर्शन आणि धनकवडी येथील शंकर महाराज मठाची ओळख यामुळे त्यांचा आध्यात्मिक पाया अधिक दृढ झाला. त्यांच्या आईने दिलेला ‘नवनाथ भक्तीसार’ हा पवित्र ग्रंथ त्यांच्या जीवनातील एक महत्त्वाचा टप्पा ठरला, ज्यामुळे आध्यात्मिक विज्ञानांबद्दलची त्यांची दृष्टी अधिक व्यापक झाली.
अमृत तांबडे सांगतात की, पुण्यात येऊन स्वतःला घडवण्याची संधी मिळाली नसती, तर कदाचित ते आजही एका छोट्या किराणा दुकानात काम करत असते. एका साध्या गावकऱ्या तरुणापासून ते आज एक प्रतिष्ठित ज्योतिषी व रत्नतज्ञ बनण्यापर्यंतचा प्रवास अनेक तरुणांसाठी प्रेरणादायी आहे.
