जैतापूर वार्ताहर:
कामगार न्यायालयातील निष्णात वकील, जैतापूर एज्युकेशन सोसायटी, मुंबईचे अनेक वर्षे कार्याध्यक्ष तसेच सामाजिक, शैक्षणिक आणि साहित्य क्षेत्रात उल्लेखनीय योगदान देणारे जैतापूरचे रहिवासी पै. अॅड. शफी इब्राहीम काझी यांचे मुंबई येथे हृदयविकाराच्या तीव्र धक्क्याने निधन झाले. ते ८६ वर्षांचे होते.
अॅड. शफी काझी हे शिक्षण व व्यवसायानिमित्त मुंबई येथे वास्तव्यास होते. कायदे क्षेत्रात प्रदीर्घ काळ कार्यरत राहून त्यांनी कामगार न्यायालयातील निष्णात वकील म्हणून आपली वेगळी ओळख निर्माण केली होती. तसेच जैतापूर एज्युकेशन सोसायटीच्या कार्याध्यक्षपदाची जबाबदारी त्यांनी अनेक वर्षे सांभाळली. संस्थेच्या शैक्षणिक वाटचालीत त्यांचे मोलाचे योगदान राहिले.
सामाजिक, शैक्षणिक आणि साहित्य क्षेत्रातही त्यांनी उल्लेखनीय कार्य केले. त्यांच्या कार्यामुळे जैतापूरच्या सामाजिक व शैक्षणिक क्षेत्रात त्यांचा विशेष आदर होता. त्यांच्या निधनाने या क्षेत्राची मोठी हानी झाली आहे.
दरम्यान, काल मुंबई येथील त्यांच्या निवासस्थानी त्यांचे पार्थिव अंत्यदर्शनासाठी ठेवण्यात आले होते. नातेवाईक, मित्रपरिवार तसेच विविध क्षेत्रातील मान्यवरांनी अंत्यदर्शन घेत त्यांना श्रद्धांजली अर्पण केली. त्यानंतर आज त्यांचे पार्थिव जैतापूर येथे आणण्यात आले असून, जैतापूर येथील दफनभूमीत त्यांच्या पार्थिवावर अंतिम संस्कार करण्यात येणार आहेत.
त्यांच्या पश्चात एक मुलगा, सून, दोन मुली, जावई आणि नातवंडे असा परिवार आहे.
जैतापूर एज्युकेशन सोसायटीच्या वतीने अॅड. शफी इब्राहीम काझी यांना भावपूर्ण श्रद्धांजली अर्पण करण्यात आली. त्यांच्या निधनाने जैतापूर परिसरात हळहळ व्यक्त होत आहे.
